गुलरिया : बर्दियाको मधुवन नगरपालिकाको प्रमुख पदमा नेपाली कांग्रेसका तेजबहादुर भाट र उप्रमुख पदमा अनिता चौधरी विजयी भएका छन्।
नेकपा माओवादी केन्द्रका उम्मेदवारलाई पराजित गर्दै कांग्रेसका भाट र चौधरी निर्वाचित भएका हुन्।
भाटले ८ हजार ७७५ मत प्राप्त गरेका छन्। उनका निकटतम प्रतिद्वन्दी नेकपा माओवादी केन्द्रका लक्ष्मीप्रसाद शर्माले ७ हजार ९३१ मत प्राप्त गरे।
उप्रमुख पदमा कांग्रेसकी चौधरीले ८ हजार ३३५ मत प्राप्त गरी विजयी भएकी छन्। प्रतिस्पर्धी माओवादी केन्द्रकी शुभद्रा चौधरीले ७ हजार ८९९ मत प्राप्त गरिन्। मधुवनमा तेस्रो स्थान पाएको नेकपा एमालेका प्रमुख पदका उम्मेदवार धर्मराज थापाले ५ हजार ८०७ र उपप्रमुख सम्झना विकले ६ हजार ६४ मत प्राप्त गरेका छन्।
मधुवन नगरपालिकाको ५ वटा वडा कांग्रेसले, २ वटा माओवादीले र एमाले/स्वतन्त्र १/१ वडा जितेका छन्। निर्वाचन अधिकृतको कार्यालय मधुवनकाअनुसार कांग्रेसबाट वडा नम्वर १ को अध्यक्ष पदमा मिनबहादुर थापा, ४ मा बलिराम चौधरी, ५ मा दिलिप गुरुङ, ८ मा मेक बहादुर गुरुङ र ९ मा मिनप्रसाद शर्मा पौडेल विजयी भएका छन्।
माओवादी केन्द्रबाट वडा नम्वर २ मा आशाराम थारु, ७ मा राजेन्द्र हमाल विजयी भएका हुन्। स्वतन्त्रबाट वडा नम्बर ३ मा नारायण मल्ल तथा एमालेबाट वडा नम्बर ६ मा चन्द्र सिंह गुरुङ विजयी भएका छन्।
प्रतिक्रिया दिनुहोस !
