जाजरकोटको नलगाड नगर प्रमुखमा माओवादी, उपप्रमुखमा कांग्रेस विजयी
जेठ ४, २०७९ बुधबार ८:२३:०
जाजरकोट : जाजरकोटको नलगाड नगरपालिकामा नेकपा माओवादी केन्द्रका डम्बरबहादुर रावत नगरप्रमुखमा विजयी भएका छन्। सत्ता गठबन्धनका साझा उम्मेदवार रावतले नेकपा एमालेका धर्मबहादुर शाहीलाई फराकिलो मतान्तरले पराजित गरेका हुन्।
माओवादी केन्द्रका रावतले पाँच हजार पाँच सय ९९ मत ल्याएर विजयी भएका हुन्। उनका प्रतिस्पर्धी एमालेका शाहीले तीन हजार छ सय २६ मत प्राप्त गरेका थिए। गत स्थानीय तहको निर्वाचनमा माआवादी केन्द्रले नगरप्रमुख र उपप्रमुख दुवै एक्लै जितेको थियो।
उपप्रमुखमा सत्ता गठबन्धनकातर्फबाट नेपाली कांग्रेसका सरिता सिंह विजयी भएकी छन्। उनले पाँच हजार चार सय छ मत प्राप्त गरि विजयी भएकी हुन्। उनका निकटतम प्रतिद्वन्द्वी एमालेका सुनिता बोहराले तीन हजार तीन सय ९३ मत प्राप्त गरेको मुख्य निर्वाचन अधिकृतको कार्यालयले जनाएको छ।
प्रतिक्रिया दिनुहोस !
