जुनीचाँदेमा माओवादी केन्द्रको गढ भत्काउँदै एमालेका बेदबहादुर शाही विजयी
जेठ ४, २०७९ बुधबार ९:५३:०
जाजरकोट : जाजरकोटको जुनीचाँदे गाँउपालिकामा माओवादी केन्द्रको गढ भत्काउँदै नेकपा एमालेका वेदवहादुर शाही अध्यक्षमा निर्वाचित भएका छन्। एमालेका शाहीले सत्ता गठबन्धनका साझा उम्मेदवार माओवादी केन्द्रका शिवा आचार्यलाई पराजित गदै विजयी भएका हुन्।
शाहीले तीन हजार चार सय ४४ मत प्राप्त गरेर विजयी भएका हुन्। उनका प्रतिस्पर्धी माओवादी केन्द्रकी शिवा आचार्यले तीन हजार ८८ मत प्राप्त गरेकी छन्। आचार्य यस अघिकी उपाध्यक्ष तथा कार्यवाहक अध्यक्ष हुन्। उनलाई काँग्रेस र समाजवादीले समर्थन गरेपनि माओवादी केन्द्रकै बागी उम्मेदवार भएका कारण उनले हार ब्यहोर्नु परेको हो।
माओवादी केन्द्रका बागी उम्मेदवार दुर्गाबहादुर शाही दामोदरले नौ सय १३ मत प्राप्त गरेका थिए। यस अघि अध्यक्ष र उपाध्यक्ष दुवै माओवादी केन्द्रले जितेको थियो। यो गाँउपालिका माओवादी केन्द्रको गढ मानिन्थ्यो। अध्यक्षमा विजेता भएका शाही अघिल्लो चुनावमा माओवादी केन्द्रका उम्मेदवार सँग पराजित भएका थिए।
उपाध्यक्षमा भने सत्ता गठबन्धनको तर्फका नेपाली काँग्रेसका उम्मेदवार विरेन्द्र शाही विजयी भएका छन्। उनले तीन हजार सात सय १४ मत प्राप्त गरेर विजयी भएका हुन्। उनका प्रतिस्पर्धी एमालेका अम्बा कुमारी शाहले दुई हजार आठ सय ११ मत प्राप्त गरेकी छन्।
प्रतिक्रिया दिनुहोस !
