पृथ्वीसुब्बाको पालिका क्व्होलासोंथारमा एमालेको ‘क्लिन स्वीप’

बेंसीसहर : लमजुङको क्व्होलासोंथार गाउँपालिकामा नेकपा एमालेले ‘क्लिन स्वीप’ गरेको छ ।  एमालेका उपमहासचिव एवं गण्डकी प्रदेशका संस्थापक मुख्यमन्त्री पृथ्वीसुब्बा गुरुङको पालिका अध्यक्ष, उपाध्यक्ष, ९ वटै वडाका अध्यक्ष र सबै सदस्यमा एमाले विजयी भएको हो ।

बुधबार राति सकिएको मतगणना अनुसार गाउँपालिका अध्यक्षमा एमालेका सूर्यप्रसाद गुरुङ विजयी भएका छन् । प्रतिद्वन्द्वी कांग्रेसका टेकबहादुर गुरुङलाई १ हजार ३ सय ६७ मतले हराउँदै सूर्यप्रसाद गुरुङले जित हात पारेका हुन् । सूर्यप्रसादले ३ हजार ८ सय ५६ मत ल्याएका छन् । प्रतिद्वन्द्वी टेकबहादुर गुरुङले २ हजार ४ सय ८९ मत ल्याएका छन् । अध्यक्षमा मंगोल नेश्नल अर्गनाइजेशनमा भुवरजंग गुरुङले ५१ मत प्राप्त गरेका छन् । अध्यक्षमा निर्वाचित सूर्यप्रसाद पृथ्वीसुब्बा गुरुङ मुख्यमन्त्री हुँदा स्वकिय सचिव थिए ।

उपाध्यक्षमा गमीमाया गुरुङ निर्वाचित भएकी छन् । कांग्रेसकी उम्मेदवार सिर्जना गुरुङलाई १ हजार ६ सय ४९ मतान्तरमा उपाध्यक्ष हासिल गरेकी हुन् । गमीमायाले ३ हजार ९ सय ८९ मत पाएकी छन् । सिर्जनाले २ हजार ३ सय ४० मत पाइन् । 

वडाअध्यक्षतर्फ वडा नं. १ मा पेमा गुरुङ, वडा नं. २ मा खुसीमान गुरुङ, वडा नं. ३ मा आसबीर गुरुङ, वडा नं. ४ मा नारायण गुरुङ, वडा नं. ५ मा गीतबहादुर गुरुङ, वडा नं. ६ मा मनलाल गुरुङ, वडा नं. ७ मा लक्षुमन गुरुङ, वडा नं. ८ मा सन्तोष घले र वडा नं. ९ मा हुमराज गुरुङसहित सबै सदस्य एमालेले जितेको निर्वाचन अधिकृत तुलसीप्रसाद घिमिरेले बताए ।

२०७४ को स्थानीय चुनावमा क्व्होलासोंथर २ र ८ को अध्यक्ष र केही सदस्य कांग्रेसले जितेको थियो । यसपटक पालिका अध्यक्ष, उपाध्यक्ष, वडाअध्यक्ष र सदस्य गरी ९ वटै वडाका ४७ जना जनप्रतिनिधि नै एमालेका उम्मेदवार निर्वाचित भएको सहायक निर्वाचन अधिकृत त्रिलोकचन्द्र गुरुङले बताए । सबै पदमा एउटै दलको क्लिन स्वीप भएको जिल्लामै यो एक मात्र पालिका हो ।