टीकापुरको मेयरमा नागरिक उन्मुक्तिका रामलाल डगौरा निर्वाचित

टीकापुर : निलम्बित संसद रेशमलाल चौधरी समर्थित नागरिक उन्मुक्ति पार्टीले कैलालीको टीकापुर नगरपालिकाको मेयरमा जीत हासिल गरेको छ। नागरिक उन्मुक्ति पार्टीका रामलाल डगौरा थारु ३ हजार मतान्तरले विजयी भएका छन्। उनले प्रतिस्पर्धी गठबन्धनका तर्फबाट नेपाली कांग्रेसका नवराज रावलभन्दा ३ हजार मत बढी ल्याएका छन्। 

निर्वाचन अधिकृत पुष्कर खड्काका अनुसार थारुले ९ हजार ६ सय ४२ र रावलले ६ हजार ६ सय ४२ मत प्राप्त गरेका छन्। उनका अनुसार उपमेयरमा भने गठबन्धतर्फबाट नेकपा माओवादी केन्द्रका खडकबहादुर शाह विजयी भएका छन्। उनले ७ हजार ९ सय ५५ मत ल्याएका छन्। उनका प्रतिस्पर्धी नागरिक उन्मुक्तिका उल्कादेवी विकले ७ हजार ८ शय २ मत पाएकी छन्। 

टीकापुर नगरपालिकामा ३१ हजार ५ सय २३ मत खसेको थियो। सबैभन्दा बढी मत खसेको वडा नं. १ मा नेकपा एमालेका मोहन विक विजयी भएका छन्। उनी प्रतिस्पर्धी नागरिक उन्मुक्तिका लक्ष्मण चौधरीभन्दा ३ मत बढी ल्याएर विजयी भएका निर्वाचन अधिकृत खड्काले जानकारी दिए। विकले २ हजार ४ सय ९८ र चौधरीले २ हजार ४ सय ९५ मत पाएका छन्। वडा नं. १ मा ११ हजार ७९ मत खसेको थियो। 

कुल नौवटा वडामध्ये कांग्रेसले ३, माओवादी केन्द्रले ३, नागरिक उन्मुक्तिले २ र एमालेले एक वडाध्यक्ष जितेको छ। कांग्रेसतर्फबाट वडा नं. २ मा दीपक चौधरी, वडा नं. ३ मा ऋषी श्रीपाइली र वडा नं. ६ मा बलिराम चौधरी विजयी भएका छन्। 

त्यस्तै माओवादी केन्द्रबाट वडा नं. ७ मा यज्ञप्रसाद न्यौपाने, वडा नं. ८ मा दीर्घबहादुर ठकुल्ला र वडा नं. ९ मा लौटन चौधरी विजयी भएका छन्। ठकुल्ला र चौधरी यसअघि समेत वडाध्यक्ष थिए। 

नागरिक उन्मुक्तिका तर्फबाट वडा नं. ४ मा लालविर चौधरी र वडा नं. ५ मा बलबिर चौधरी विजयी भएका छन्। वडा नं. ४ का लालविर यसअघि समेत वडाध्यक्ष थिए। यसअघि नागरिक उन्मुक्ति पार्टीले जोशीपुर गाउँपालिकामा समेत अध्यक्ष र उपाध्यक्षमा जीत हात पारेको थियो।