कञ्चनपुरको बेदकोटको मेयरमा कांग्रेसका भोजराज बोहरा निर्वाचित
जेठ ५, २०७९ बिहीबार ११:४९:०
महेन्द्रनगर : यसपटकको निर्वाचनमा एमालेको गढ मानिने बेदकोट नगरपालिकामा नेपाली कांग्रेसले बर्चश्व जमाएको छ ।
०७४ सालमा एक मात्रै वडा जितेको कांग्रेसले यसपटक मेयर उपमेयरसहित ५ वडामा विजयी हाँसिल गरेको छ।
०७४ सालको स्थानीय तह निर्वाचनमा मेयर उपमेयरसहित ८ वडामा जितेको नेकपा एमाले यसपटक २ वडामा मात्रै सिमित भएको छ ।
बेदकोट नगरपालिकाको मेयरका उम्मेदवार नेपाली कांग्रेसका भोजराज बोहराले ८ हजार ७८ मत प्राप्त गरे ।
उनका प्रतिस्पर्धी नेकपा एमालेकी सुसिला सिंहले ४ हजार ७४० मत प्राप्त गरिन् ।
माओवादी र समाजवादीको गठबन्धनबाट मेयरका उम्मेदवार समाजवादीका रामचन्द्र रेग्मीले ३ हजार ८९८ र राप्रपाका बमबहादुर बलले १ हजार ७५१ मत ल्याए ।
उपमेयरमा नेपाली कांग्रेसकी तुलशी जोशी ७ हजार २५४ मतसहित विजयी भइन् । उनका प्रतिस्पर्धी एमालेकी पार्वती भट्टले ५ हजार ७२७ मत प्राप्त गरिन् । गठबन्धनबाट माओवादीकी हिरा जैसीले ३ हजार ६५२ मत प्राप्त गरिन् ।
त्यसैगरी, महाकाली पारीको गाउँ भनेर चिनिने दोधारा चाँदनी नगरपालिकामा कांग्रेसले विरासत जोगाउन सकेन । २०४६ सालपछि पहिलो पटक एमालेले जीत हाँसिल गरेको छ ।
कांग्रेसको गढ मानिने दोधाराचाँदनीमा यसपटक एमालले वर्चश्व जमाएको छ । दोधाराचाँदनी नगरपालिकाको मेयरमा एमालेका किशोर लिम्बू निर्वाचित भएका छन् ।
लिम्बूले ७ हजार १०४ मत ल्याए । उनका निकटतम प्रतिद्वन्दवी नेपाली कांग्रेसका गोपालदत्त भट्टले ६ हजार १७२ ल्याए भने स्वतन्त्र उम्मेदवार भीमबहादुर कुमालले १ हजार ८५३ मत हाँसिल गरे ।
उपमेयरमा कांग्रेसकी गंगादेवी जोशी ६ हजार ३६५ मत सहित विजयी भइन् । उनकी निकटतम् प्रतिस्पर्धी एमालेकी खीमा चन्दले ५ हजार ८२६ मत प्राप्त गरिन् ।
०७४ सालको चुनावमा कांग्रेसले मेयरसहित ५ वटा वडा जितेको थियो । यसपटक उपमेयर र एक वडाध्यक्षमा समिति भएको छ । नौ पालिका रहेको कञ्चनपुरमा भीमदत्त, शुक्लाफाँटा, कृष्णपुर र पुर्नबास नगरपालिकामा मतगणना जारी छ ।
अन्य दुई पालिकामा कांग्रेस,दुईपालिकामा एमाले र एक पालिकामा माओवादी विजयी भएको छ ।
प्रतिक्रिया दिनुहोस !
