स्रोत व्यक्तिबाट राजीनामा दिएका भारत बने अन्नपूर्ण गाउँपालिकाको अध्यक्ष

बेनी : म्याग्दीको अन्नपूर्ण गाउँपालिकाको शिक्षा शाखाको स्रोत व्यक्तिबाट राजीनामा दिएर उम्मेदवार बनेका भारतकुमार पुन सोही पालिकाको अध्यक्षमा निर्वाचित भएका छन् । स्थानीय तह निर्वाचनमा नेकपा एमालेबाट उम्मेदवार बनेका पुन अध्यक्षमा र दिवा तिलिजा पुन उपाध्यक्षमा निर्वाचित भएका हुन् । ४ वर्ष शिक्षा शाखा संयोजकको रुपमा काम पुन गाउँपालिका अध्यक्ष बनेका हुन् ।  

तत्कालीन शिक्षा कार्यालयको स्रोत व्यक्तिको रुपमा १३ वर्ष काम गरेका पुनले गाउँपालिकाको शिक्षा शाखा संयोजक पदबाट राजीनामा दिएर चुनावी मैदानमा आएका थिए । अध्यक्षमा विजयी पुनले चार हजार ५८ र उपाध्यक्षमा निर्वाचित तिलिजाले चार हजार १५ मत पाएको निर्वाचन अधिकृतको कार्यालयले जनाएको छ । 

कांग्रेसका बलहादुर तिलिजाले गाउँपालिका अध्यक्षमा तीन हजार ३१६ र उपाध्यक्षमा ललिता तिलिजाले तीन हजार ३५८ मत पाएका छन् । उपाध्यक्षमा निर्वाचित अन्नपूर्ण गाउँपालिकाको वडा नम्बर ५ पाउद्धारकी ५१ वर्षीय तिलिजा पुन गैरसरकारी क्षेत्रबाट राजनीतिमा आएकी हुन् । ग्रामीण विकासमा स्नाकोत्तर गरेकी पुन गैरसरकारी संस्था मिलन म्याग्दीमा २०५८ देखि आवद्ध छिन् । एक पटक अध्यक्ष समेत भएकी पुन मिलनको कार्यकारी निर्देशकबाट राजीनामा दिएर गाउँपालिका उपाध्यक्षको उमेद्वार बनेकी थिइन् ।  

१२ हजार २६ जना मतदाता रहेको अन्नपूर्ण गाउँपालिकामा ६४ प्रतिशत अथवा सात हजार ८०३ मत खसेको थियो । निर्वाचित हुने ४२ पदका लागि ९८ जना उम्मेदवार चुनावी मैदानमा उत्रिएका थिए । आठ वटा वडा रहेको अन्नपूर्णमा एमालेले पाँच र कांग्रेसले तीन वटा वडाको अध्यक्ष जितेका छन् । 

वडा नम्बर १ मा उमालेका दिलिपकुमार गर्बुजा, २ मा एमालेका ओम फगामी, ३ मा रमेश पुर्जा, ४ मा कांग्रेसका लोकबहादुर फगामी, ५ मा कांग्रेसका राजेश तिलिजा, ६ मा काँग्रेसका रामबहादुर खड्का, ७ मा एमालेका माइलन पुर्जा पुन र ८ मा एमालेका खम गर्बुजा निर्वाचित हुनुभएको सहायक निर्वाचन अधिकृत सुरणप्रसाद शर्मा पौडेलले बताए । 

म्याग्दीको अन्नपूर्ण गाउँपालिकाको अध्यक्षमा निर्वाचित भारतकुमार पुन र उपाध्यक्ष दिवाकुमारी तिलिजा पुन । तस्बिर : सौजन्य सुरेन गुरुङ