सिंहदरबारभित्रको रुखको हाँगाले लागेर एकजनाको मृत्यु

काठमाडौं : सिंहदरबारभित्र रहेको रुखको हाँगा भाँचिदा पाल्पाका विजय कार्कीको मृत्यु भएको छ। रम्भा गाउँपालिका ५ ताहु घर भइ हाल राट्रिय अनुसनधान विभागमा सुचक पदमा कार्यरत २७ वर्षीय कार्कीको गएराती मृत्यु भएको हो। 

महानगरीय प्रहरी परिसर काठमाडौंका प्रवक्ता दिनेशराज मैनालीका अनुसार बुधबार राती पौने ८ बजे एक्कासी आएको हावाहुरीका कारण सिंहदरवार परिसरमा रहेको रुखको हाँगा भाँच्चिएको थियो।
 

राट्रिय अनुसन्धान परिसरमा रहेको क्यान्टिनमा खाना खाएर सुत्न जाने क्रममा कार्कीलाई रुखको हाँगा भाँच्चिएर टाउकोमा लागेको थियो। एक्कासी टाउकोमा बजारिएको रुखको हाँगाको चोटले उनी गम्भीर घाइते भएका थिए। उनलाई तत्कालै बानेश्वरस्थित सिभिल अस्पताल पुर्‍याइएको थियो। 

उपचारको क्रममा राती सवा ११ बजे कार्कीको मृत्यु भएको हो। उनको शवलाई पोष्टमार्टमको लागि शिक्षण अस्पताल महाराजगन्जमा पठाइएको मैनालीले जानकारी दिए।