जनकपुरधाम : जनकपुरधाम उपमहानगरपालिकामा स्वतन्त्र उम्मेदवार भन्दा सत्तारुढ गठबन्धनका उम्मेदवार ६ हजार बढी मतले पछाडि परेका छन्। कांग्रेसका बागी उम्मेदवार मनोजकुमार साहभन्दा जनकपुरधाम उपमहानगरपालिकाका निवर्तमान मेयर तथा जनता समाजवादी पार्टीका उम्मेदवार लालकिशोर साह ६ हजार बढी मतले पछाडि छन्। कांग्रेसका बागी उम्मेदवार मनोज साहले सुरुवाती चरणदेखिको अग्रता कायमै राखेका हुन्।
कांग्रेसको तर्फबाट उम्मेदवार बन्न नसकेको स्वतन्त्र उम्मेदवार मनोज साह ८ हजार ४ सय ३६ मतसहित पहिलो स्थानमा छन्। गठबन्धनका उम्मेदवार भने उनीसँग ६ हजार भन्दा बढी मतले पछि छन्। गठबन्धनको तर्फबाट जसपाका लालकिशोर साह मेयरका उम्मेदवार हुन् तर उनी २ हजार ३७३ मतसहित पाँचौ स्थानमा छन्।
दोश्रो स्थानमा नेकपा एमालेका शिवशंकर साह (हिरा) छन्। उनले ५ हजार ८ सय ९५ मत ल्याएका हुन् भने लोकतान्त्रिक समाजवादी पार्टीका मनोज चौधरी ३ हजार ४०, स्वतन्त्र उम्मेदवार बलराम महतो २ हजार ५ सय ७५ मत ल्याएका हुन्।
यस्तै स्वतन्त्र उम्मेदवार जानकीराम साह १ हजार ३६६, जनमत पार्टीकी अनिता देवी ८९७, लोकतान्त्रिक समाजवादी पार्टीकी विभा ठाकुर ८९२ मत ल्यएकी हुन्।
यस्तै उपमेयरतर्फ गठबन्धनबाट कांग्रेसका किशोरी साह ९ हजार ४ सय ४५ मतसहित पहिलो स्थानमा रहेका छन्। नेकपा एमालेकी रुणा झा ६ हजार ९ सय ४, लोसपाकी रिता कुमारी मिश्र ३ हजार ५९, स्वतन्त्र उम्मेदवार निर्मल चौधरी २ हजार ४९६, जनमतका संतोष कुमार साह १ हजार ४८, तमलोपाका ईश्वर पंडित कुम्हार ८४५ मत ल्याए।
प्रतिक्रिया दिनुहोस !
