मलंगवा : सर्लाहीको बरहथवा नगरपालिकामा एमालेकी उम्मेदवार कल्पनाकुमारी कटुवाल नगरप्रमुखमा विजयी भएकी छन्। कटुवालले नेकपा माओवादी केन्द्रका उम्मेदवारसमेत रहेका निवर्तमान मेयर देवानन्द महतोलाई ५ हजार ६ सय ७ मतले हराउँदै विजयी भएकी हुन्। कटुवालले १२ हजार २ सय ७३ मत ल्याउँदा महतोले ६ हजार ६ सय ६६ मत मात्र ल्याएका छन्।
त्यसै गरी उपप्रमुखमा एमालेकै रामबाबु प्रसाद साह विजयी भएका छन्। उनले ९ हजार ९ सय १ मत ल्याउँदा नेपाली कांग्रेसकी गंगा दहालले ७ हजार १ सय १९ मत ल्याएकी छिन्। माओवादी केन्द्रका उम्मेदवार तथा निवर्तमान उपप्रमुख सीतादेवी माझीले ६ हजार ३ सय १४ मत मात्र ल्याइन्।
बरहथवाको जितसँगै एमालेले जिल्लामा साख जोगाउन सफल भएका छन्। १९ वटा पालिकाको नतिजा सार्वजनिक भएर सकिंदा एमालेले एउटा पालिका समेत जित्न सकेको थिएन। पछिल्लो निर्वाचनमा चार स्थानीय तह जितेका एमाले एउटामा सिमित भएको छ। सर्लाहीमा कांग्रेसले १२ पालिकामा जित्न निकाल्न सफल भएको छ। माओवादी केन्द्रले चार, जसपाले दुई तथा एमाले र लोसपाले समान १-१ पालिका जितेको छ।
प्रतिक्रिया दिनुहोस !
