पोखरा : दसकौंदेखि कम्युनिस्ट किल्ला रहेको पोखरा महानगरपालिकाका बहुमत वडामा नेपाली कांग्रेसका वडाध्यक्ष उम्मेदवार विजयी भएका छन् ।
मतगणना जारी केही वडामा समेत कांग्रेसले अग्रता लिएको छ । पछिल्लो मतपरिणामअनुसार कांग्रेसले १९ वडामा जित हाँसिल गरेको छ।
एमालेले ८ वडामा मात्रै अध्यक्ष जितेको छ । ६ वटा वडाको मतगणना जारी छ ।
२०७४ सालको निर्वाचनमा कांग्रेसले ११ वडा मात्र जितेको थियो । एमालेले मेयर उपमेयरसहित २२ वडा जितेको थियो । २०४९ र २०५४ सालदेखि एमालेले जित्दै आएका वडाहरुमा समेत यसपाली कांग्रेसले बाजी मारेको छ ।
एमालेले २०७४ मा जितेका ७, १३, १४, १६, २४, २५, २६, ३० र ३१ नम्बर वडामा यसपालि कांग्रेसले जितेको हो । तीमध्ये पोखरा नगरका पुरानै र कतिपय नगरमा मिसिएका ग्रामीण क्षेत्र पर्ने वडा हुन् । गाविस हुँदा पनि एमालेले
दसकौंदेखि जितेका ठाउँमा कांग्रेसले सफलता प्राप्त गरेको हो । २०७४ मा आफूले नजितेको वडा नम्बर ६ मात्रै एमालेले यसपालि फर्कायो । तर, पहिलाको जस्तो गरी अरु वडा जित्न सकेन ।
एमालेबाट पोखराको मेयरका उम्मेदवार कृष्ण थापाको वडा नम्बर १६ पनि कांग्रेसले जितेको छ । कांग्रेसको पकड भन्ने गरिएको पोखरा ८ मा अघिल्लो पालिको आफ्नो जितको विरासत एमालेले कायम गर्यो । संगठन विभाग प्रमुख खगराज अधिकारीको गृहवडा पोखरा ३१ मा पनि दसकौंदेखिको एमाले विरासतमाथि कांग्रेसले बाजी मारेको छ ।
मतगणनाको पछिल्लो परिणामअनुसार सोमबार मध्यान्हसम्म सत्ता गठबन्धनबाट मेयरका उम्मेदवार नेकपा एसका धनराज आचार्य एमालेका कृष्ण थापाभन्दा ४ हजार मतले अघि छन् । आचार्यको मत ५० हजार ६ सय १२ आएको छ । थापाले ४६ हजार ५ सय ८३ मत ल्याएका छन् ।
उपमेयरमा भने एमालेकी मञ्जुदेवी गुरुङले अग्रता लिएकी छन् । गुरुङले ५३ हजार १ सय ७३ मत प्राप्त गरेकी छन् ।
यस्तै, कांग्रेसबाट उपमेयरकी उम्मेदवार कोपिला रानाभाटले मत ४९ हजार ५ सय ८६ प्राप्त गरेकी छन्। एमालेले गुमाएका कतिपय वडामा सदस्यहरुमा पनि कांग्रेसले जित हाँसिल गरेको छ ।
वडा नम्बर ७, १६, २४ र २५ मा वडाध्यक्ष कांग्रेस उम्मेदवारले जित्दा अरु ४ सदस्य एमालेका उम्मेदवार विजयी भएका छन् ।
प्रतिक्रिया दिनुहोस !
