जिसस दैलेखमा गठबन्धन पराजित, प्रमुखमा स्वतन्त्र, उपप्रमुखमा एमाले विजयी
जेठ २६, २०७९ बिहीबार १५:११:०
दैलेख : जिल्ला समन्वय समिति दैलेखका प्रमुखमा स्वतन्त्र उम्मेदवार नमराज शाही विजयी भएका छन् ।
शाही सत्ता गठबन्धनका उम्मेदवारलाई हराउँदै जिसस प्रमुखमा विजयी भएका हुन् ।
जिसस प्रमुखमा निर्वाचित शाहीले १३ मत प्राप्त गरे ।
सत्ता गठबन्धनमा रहेका नेपाली कांग्रेस, नेकपा माओवादी केन्द्र र एकीकृत समाजवादीको तर्फबाट प्रमुखको उम्मेदवार नेपाली कांग्रेसकी दुर्गा कुमारी श्रेष्ठले ९ मत पाइन् ।
स्वतन्त्र उम्मेदवारी दिएर जिसस प्रमुखमा निर्वाचित शाही नेपाली कांग्रेस दैलेखका उपसभापति हुन् । उनले स्वतन्त्र उम्मेदवारी दिएपछि कांग्रेसले साधारण सदस्य समेत नरहने गरी उनलाई पार्टीबाट निष्कासन गरिसकेको छ ।
जिसस प्रमुखमा निर्वाचित शाहीलाई एमालेले सहयोग गरेको थियो ।
कर्णाली प्रदेशमा सबैभन्दा धेरै ११ वटा स्थानीय तह रहेको दैलेखमा प्रमुख/उपप्रमुख तथा अध्यक्ष/ उपाध्यक्ष गरी २२ जना मतदाता थिए ।
जिल्ला समन्वय समिति निर्वाचनका लागि एमालेका १०, नेपाली कांग्रेसका ९, माओवादी केन्द्रका २ र समाजवादीका १ जना मतदाताले मतदान गरेका थिए ।
यस्तै, जिल्ला समन्वय समितिको उपप्रमुखमा सत्ता गठबन्धनलाई हराउँदै नेकपा एमालेका उम्मेदवार केशवबहादुर शाही निर्वाचित भएका छन् ।
उनले ११ मत प्राप्त गरेर विजयी भएका छन् । गठबन्धनको तर्फबाट उपप्रमुखको उम्मेदवार बनेकी एकीकृत समाजवादीकी शान्ति शाहीले १० मत प्राप्त गरिन् ।
जिल्ला समन्वय समितिको ३ जना महिला सदस्यमा सत्ता गठबन्धनको तर्फबाट उम्मेदवार बनेका नेकपा एकीकृत समाजवादीका उम्मेदवार विजयी भएका छन् ।
महिला सदस्यमा नेकपा एकीकृत समाजवादीका ११ मत सहित कविताकुमारी गिरी, ११ मतसहित कोकीलाकुमारी खड्का र ११ मत सहित पूर्णा विक निर्वाचित भएका छन् ।
दलित वा अल्पसंख्यक सदस्यमा सत्ता गठबन्धनको तर्फबाट उम्मेदवारी बनेकी नेकपा माओवादी केन्द्रकी तुल्छा विक ११ मत ल्याएर निर्वाचित भएकी छन् ।
यस्तै, अन्य ३ जना सदस्यमा सत्ता गठबन्धनबाट उम्मेदवार बनेका कांग्रेसका अंगबहादुर शाही ११ मत र नेकपा माओवादी केन्द्रका फत्तबहादुर डांगी ११ मत सहित विजयी भएका छन् ।
अन्य सदस्यमै स्वतन्त्र उम्मेदवार दिलबहादुर शाही ११ मत सहित विजयी भएका छन् ।
प्रतिक्रिया दिनुहोस !
