डोटीको उडितोलामा घरभित्र पस्यो चितुवा, दुईजना घाइते
असार ३, २०७९ शुक्रबार १६:११:०
डोटी : डोटीको दिपायल सिलगढी नगरपालिका वडा ७ उडितोलामा घरभित्र चितुवा पसेको छ ।
घरभित्र पसेको चितुवाले दुईजनालाई घाइते बनाएको छ ।
शुक्रबार बिहान साढे १० बजेतिर तल्लो उडितोलास्थित पार्वती विकको घरभित्र चितुवा पसेको प्रहरीले जनाएको छ ।
चितुवाको आक्रमणबाट पार्वती विक र उनकी छोरी लक्ष्मी विक घाइते भएको जिल्ला प्रहरी कार्यालय डोटीले जानकारी दिएको छ ।
जिल्ला प्रहरी कार्यालय डोटीका प्रहरी निरीक्षक लक्ष्मीराज जोशीका अनुसार घरभित्र रहेका उनीहरूलाई चितुवाले आक्रमण गरेको हो ।
घरभित्र छिरेको चितुवा केही बेरपछि मात्रै निस्किएको थियो ।
चितुवाको आक्रमणमा परेकी ४५ वर्षीया पार्वतीको हात, टाउकोमा र उनकी ३ वर्षीया छोरी लक्ष्मीको घाँटी र टाउकोमा चोट लागेको छ ।
उनीहरूको अवस्था सामान्य रहेको र जिल्ला अस्पताल डोटीमा उपचार भइरहेको छ ।
यसरी दिउँसै चितुवा गाउँमा पसेपछि स्थानीय त्रसित भएका छन् ।
अहिले जिल्ला प्रहरी कार्यालय डोटी र डिभिजन बन कार्यालय डोटीको टोली र स्थानीयको सहयोगमा चितुवालाई बनतिर पठाइएको छ ।
प्रतिक्रिया दिनुहोस !
