जिन्दगी चलिरहन्छ
उसै पनि चलिरहन्छ
बाजेको पालाको खलाँती जस्तै
कसैले थिचिदेला र सास फेरौंला
भनेर आस गर्नेहरू पनि छन्
बगरको ढुंगा झैं
नदीको लहरले छोला र ब्युँझुँला भनेर
प्रतीक्षाको अनन्ततासँगै निदाउनेहरू पनि छन्
अर्काको आशीर्वादमा उदाउने
र, अर्काकै सरापमा अस्ताउनेहरू पनि छन्।
अपराधी चरणहरूमा
शिर बिसाएर
जीवनको वैतरणी तर्न खोज्नेहरूको
लाम लामो छ
बन्दुकका कारखानाहरूबाट आर्जित रकमले
शान्तिका लागि गोलमेच सम्मेलनको आयोजनामा
मक्ख छन् मान्छेहरू।
पातहरू झरेर नांगिएको रुखको हाँगामा छ गिद्ध
युगौंदेखिका अर्ती उपदेशहरू बन्द छन् सन्दुकमा
र, त्यसैमाथि स्वर्ण जलपसहित भव्य प्रतिमामा
कैद छ बुद्ध!
आँसु निख्रिएर सुक्खा छन्
आमाका आँखाहरू
लासहरूको थान गन्तीमा छन्
युगका सारथीहरू।
आमाहरू,
सायद यति अभिशप्त कहिल्यै भएनन्
लासहरू जन्माउनु पर्ने विवशताभन्दा ठूलो पीडा
इतिहासमा सायद आमाहरूले कहिल्यै भोग्नु परेन।
प्रतिक्रिया दिनुहोस !
