भैरहवामा बजार अनुगमन : ठूलो परिमाणमा पेन्ट जफत, आठवटा व्यवसायिक प्रतिष्ठान कारवाहीमा

भैरहवा : भैरहवामा बजार अनुगमन गरेर आठवटा व्यवसायिक प्रतिष्ठानलाई कारवाही गरिएको छ ।

शुक्रबार, वाणिज्य, आपूर्ति तथा उपभोक्ता संरक्षण, जिल्ला प्रशासन, घरेलु तथा साना उद्योग, खाद्य, प्रविधि तथा गुण नियन्त्रण कार्यालयलगायतको संयुक्त बजार अनुगमन टोलीले बजार अनुगमन गरेका हो । 

१३ वटा व्यवसायिक प्रतिष्ठानमा गरिएको अनुगमनमा ८ प्रतिष्ठानलाई कारवाही गरिएको छ भने अन्य पाँचवटालाई पहिलो पटकका लागि सचेत गराइएको छ । ८ वटामध्ये ५ वटाको सामान जफत, दुईवटालाई जरिवाना र एउटा सामान जफत तथा जरिवाना कारवाही गरिएको हो ।

बजार अनुगमनबाट म्याद गुज्रिएका ठूलो परिमाणमा घरमा लगाउने पेन्ट जफत गरिएको छ । संयुक्त बजार अनुगमन टोलीले विभिन्न पसलमा अनुगमन गरेर उपभोक्ताले प्रयोग गर्न नमिल्ने म्याद गुज्रिएको एक लाख ५१ हजार चार सय ४७ रुपैयाँ बराबरको विभिन्न वस्तु जफत कारवाही र तीनजनालाई ४० हजार रुपैयाँ जरिवाना कारवाही समेत गरिएको वाणिज्य, आपूर्ति तथा उपभोक्ता संरक्षण कार्यालय भैरहवाका अधिकृत एवं अनुगमन टोलीका निरीक्षक अधिकृत टेकराज भट्टराईले बताए ।

उनका अनुसार गौरीशंकर कलर हाउसले बिक्री गर्न लागि राखेको ५५ हजार एक सय रुपैयाँ बराबरको म्याद गुज्रिएको पेन्ट जफत गरी कारवाही गरिएको उनले बताए । त्यस्तै टोलीले प्रभु पेन्ट स्टोरबाट पनि ५५ हजार ६ सय रुपैयाँ र जगदम्बा पेन्ट्सबाट १९ हजार ८ सय १७ रुपैयाँ बराबरको म्याद गुज्रिएको पेन्ट जफत गरी कारवाही गरेको छ ।

त्यस्तै, टोलीले गणेश बेकरी उद्योगले बिक्री गर्न राखेका वस्तुमा साङला भेटिएकोले ४ हजार ६ सय रुपैयाँ बराबरको साम्रगी र एसके प्लाई हार्डवेयरबाट ७ सय २० रुपैयाँ बराबरको म्याद गुज्रिएको फेबिकोल जफत गरी कारवाही गरेको छ ।

यस्तै, न्यू बुद्ध ट्रेड सप्लायर्समा गरिएको अनुगमनले १५ हजार ६ सय १० रुपैयाँ बराबरको उपभोक्ताले प्रयोग गर्न नमिल्ने पेन्ट बरामद गरी २० हजार रुपैयाँको जरिवाना कारवाही गरिएको वाणिज्य, आपूर्ति तथा उपभोक्ता संरक्षण कार्यालय भैरहवाका नासु नारायण पन्थीले बताए । ‘यस सप्लायर्समा बिक्री गर्ने वस्तुको मूल्यमा केरमेट गरिएको, वस्तुमा रिलेबलिङ गरेको लगायत गर्न नमिल्ने कार्य गरेको देखिएकोले वस्तु जफत गरी जरिवाना कारवाही गरिएको हो,' उनले भने ।

उनका अनुसार बिल बिजक नरहेको बाबा जनरल स्टोर र लेडिज कपडाको विक्री गर्ने विवाह कल्केसनलाई दश/दश हजार रुपैयाँ जरिवानासहित कारवाही गरिएको छ ।

अनुगमनबाट जफत गरिएका सामग्रीहरु रितपूर्वक नष्ट गरिने अनुगमन टोलीका निरीक्षक अधिकृत भट्टराईले बताए ।