करारका कर्मचारी हटाउने डिलाशैनी गाउँपालिकाको निर्णय
असार १९, २०७९ आइतबार १३:२५:०
बैतडी : बैतडीको डिलाशैनी गाउँपालिकाले करारका कर्मचारीहरुलाई हटाउने भएको छ ।
यहि साउन १ गते पछि करारका कर्मचारीहरुको करार अवधी नथप्ने निर्णय भएको हो ।
यही असार १७ गते बसेको कार्यपालिका बैठकबाट करारका कर्मचारीहरुलाई साउन १ गतेबाट करार अवधी नथप्ने निर्णय भएको गाउँपालिकाका प्रवक्ता यज्ञ भट्टले जानकारी दिए ।
‘पारिश्रमिक खुवाउनै धौ-धौ भयो ,' उनले भने, ‘फागुनसम्मको पनि जेनतेन जनप्रतिनिधिको सेवासुविधा र लक्षित वर्गको बजेटबाट तलब खुवायौँ ।'
तलब खुवाउन नसकिने अवस्था भएकाले आवश्यकता बिनाका कर्मचारी हटाउने निर्णय भएको निमित्त प्रमुख प्रसासकीय अधिकृत गणेश सिंह बोहराले बताए ।
विकासे बजेटबाट समेत तलब खुवानुपर्ने भएकाले करारका कर्मचारीहर हटाउनु परेको उनको भनाइ छ।
'अनुगमन गर्छौं, त्यसपछि आवश्यकता बिनाका कर्मचारीको करार अवधी थपिदैन,' उनले भने ।
शिक्षक तथा विद्यालय कर्मचारी र गाउँपालिकामा कार्यरत कार्यालय सहयोगी र प्राविधक कर्मचारी हट्ने गाउँपालिकाले जनाएको छ ।
प्रतिक्रिया दिनुहोस !
