बैतडी : बैतडीमा मकैमा अमेरिकन फौजी किराको प्रकोप देखापरेको छ। केही हप्ता पहिलेदेखि जिल्लाका विभिन्न ठाउँहरूमा फौजी किराको प्रकोप देखापरेको हो।
फौजी किराले मकैका बोटहरू सखाप पार्दै आएको पाटन नगरपालिका-६ का स्थानीय एवं शिक्षक गंगादत्त अवस्थीले बताए।
जिल्लाको पाटन नगरपालिका, शिवनाथ गाउँपालिका, पञ्चेश्वर गाउँपालिका, मेलौली नगरपालिका र दशरथचन्द नगरपालिकामा फौजी किराको प्रकोप देखापरेको हो।
यी ठाउँहरुमा फौजी किराको प्रकोप देखापरेको कृषि ज्ञान केन्द्र बैतडीका प्रमुख डिवी सिंहले जानकारी दिए।
शिवनाथ गाउँपालिका, मेलौली नगरपालिका र पञ्चेश्वर गाउँपालिकाका किसानहरुलाई विषादी समेत वितरण गरिएको सिंहले बताए।
किराको प्रकोप देखिएको बेला किसानहरूले सम्बन्धित पालिकाको कृषि शाखामा सम्पर्क गर्न पनि आग्रह गरिएको छ।
प्रतिक्रिया दिनुहोस !
