काठमाडौं : अमेरिकाको नर्थ क्यारोलाइनामा डा ऋषि बस्ताकोटीद्वारा लिखित मुक्तक संग्रह 'विसंगत बस्ती' को विमोचन गरिएको छ। भानु जयन्तीको अवसरमा क्यारोलाइनस्थित केरी सहरमा आयोजना भएको साहित्यिक कार्यक्रममा पुस्तकको विमोचन गरिएको हो।
नर्थ क्यारोलाइना नेपाली साहित्य समाजका सल्लाहकार ई इश्वर देवकोटा, डा नारायण राजभण्डारी, नगेन्द्र न्यौपाने, नर्थ क्यारोलाइना नेपाली साहित्य समाजका अध्यक्ष नम्रता गुरागाई, नेपाल सेन्टर अफ नर्थ क्यारोलाइनाका अध्यक्ष आरपी पौडेल र मुक्तककार बस्ताकोटीले सामूहिक रूपमा पुस्तकको विमोचन गरेका हुन्।
कार्यक्रममा देवकोटाले मुक्तककारको परिचय प्रस्तुत गर्दै बस्ताकोटीको साहित्यिक तथा सामाजिक योगदानको चर्चा गरेका थिए। साहित्यकार गुरागाईंले विमोचित पुस्तकको समीक्षा गरेकी थिइन्।
डा अच्युत शर्मा र कल्पना घिमिरेले मुक्तककारलाई शुभकामना व्यक्त गर्दै संग्रहभित्रबाट छानिएका मुक्तकहरु बाचन गरेका थिए। डा बस्ताकोटीको दोस्रो साहित्यिक कृति 'विसंगत बस्ती' बिएन पुस्तक संसारले हालसालै बजारमा ल्याएको हो।
प्रतिक्रिया दिनुहोस !
