काठमाडौं : निर्देशक कमल एक्चै मगरको निर्देशनमा बनेको चलचित्र ‘डेसान’को फस्र्टलुक पोस्टरसँगै प्रदर्शन मिति पनि सार्वजनिक गरिएको छ। महामारीका विषयमा निर्माण गरिएको चलचित्र आगामी मंसिर २३ मा प्रदर्शन हुने निर्माण पक्षले जनाएको छ।
सार्वजनिक दुई पोस्टरमध्ये एउटामा डेब्यु अभिनेत्री पुनम थापा र अभिनेता निशान चौहान रोमान्टिक अवतारमा देखिका छन्। यसैगरी अर्काे पोस्टरमा निशान र पुनमका साथमा नम्रता सापकोटा र भोला सापकोटालाई गम्भीर मुद्रामा प्रस्तुत गरिएको छ।
पर्फमिङ आर्ट क्रिएसनको ब्यानरमा निर्मित चलचित्रमा नम्रता, निशान, भोलाराज, पुनमका साथमा कविता आले, आरुषजंग सारु, मलिका बस्नेत, प्रमीशा सारुमगरलगायतका कलाकारको अभिनय छ। चक्रबहादुर महर्जनले खिचेको चलचित्रको गीत राजु थापाले लेखेका हुन् भने हरि लम्सालको संगीत अनि प्रताप दास र प्रविशा अधिकारीको स्वर छ। मिलन श्रेष्ठले सम्पादन गरेको चलचित्रलाई एफडी, जीजीए ग्रुप र रिच इन्टरटेन्मेन्टले वितरण गर्ने भएको छ।
कोरोना महामारीको त्रासदीपूर्ण अवस्थामा छायांकन गरिएको चलचित्रले भरपुर मनोरञ्जनका साथै उपयोगी सन्देश प्रवाह गर्ने दाबी निर्माण पक्षको छ। राज थापा काउचाको कथा रहेको चलचित्रको स्क्रिप्ट निर्देशक कमल स्वयंम्ले लेखेका हुन्। कृशाला मगर कार्यकारी निर्माता रहेको चलचित्र नेपालभन्दा पहिले विभिन्न देशमा प्रदर्शन हुने तयारीमा छ।
प्रतिक्रिया दिनुहोस !
