आइएमई लाइफ इन्स्योरेन्सद्वारा सातवटै प्रदेशमा बृहत् स्वास्थ्य शिविर

काठमाडौं : आइएमई लाइफ इन्स्योरेन्सले स्थापनाको पाँचौं वर्ष पूरा गरेको अवसरमा सातवटै प्रदेशमा मंगलबार बृहत् स्वास्थ्य शिविर कार्यक्रम सञ्चालन गरेको छ। स्वास्थ्य शिविरबाट १ हजार ३०२ जनाले स्वास्थ्य जाँच गराएका छन्। 

इन्स्योरेन्सका प्रमुख कार्यकारी अधिकृत कवि फुयाँलकाअनुसार पाँचौ वर्ष पूरा भएको अवसरमा सामाजिक उत्तरदायित्वको भावना बहन गर्दै सातवटा प्रदेशका विभिन्न आठ स्थानमा बृहत् स्वास्थ्य शिविर कार्यक्रम गरिएको हो।

प्रदेश १ मा सुनसरी चक्रघट्टिमा आँखा शिविर कार्यक्रम गरिएको थियो। त्यस्तै मधेश प्रदेशमा बारा, कलैयामा दन्त शिविर सञ्चालन गरिएको थियो। त्यस्तै बागमती प्रदेशमा चितवन, नारायणघाटमा पाठेघरको मुखको क्यान्सर शिविर कार्यक्रम गरिएको थियो। यहाँ विपी कोइराला मेमोरियल क्यान्सर अस्पतालको सहकार्यमा शिविर कार्यक्रम आयोजना गरिएको हो।

त्यस्तै गण्डकी प्रदेशमा लमजुङको सोतिपसलमा जनरल स्वास्थ्य जाँच शिविर सञ्चालन गरिएको छ। लुम्बिनी प्रदेशमा गुल्मी र बाँकेको राप्ती सोनारीमा आँखा शिविर सञ्चालन गरिएको छ।

कर्णाली प्रदेशमा सुर्खेतको गुमीमा महिला स्वास्थ्य शिविर सञ्चालन गरिएको छ। सुदूरपश्चिम प्रदेशमा कैलालीस्थित टीकापुरमा पनि जनरल स्वास्थ्य जाँच शिविर सञ्चालन गरिएको छ।

यस अघि गत शुक्रबार मुलुकभर गरिएको रक्तदान कार्यक्रममा ५७१ जनाले रक्तदान गरेका थिए। त्यस्तै शनिबार गरिएको अभिकर्ता तालिममा सहभागी ७ सय ४८ जनालाई तालिम दिई प्रमाणपत्र पनि वितरण गरिएको थियो।

२०७४ भदौ १ गतेदेखि कारोबार सञ्चालनमा आएको इन्स्योरेन्सले सुरक्षा, बचत तथा लगानी लगायतका ग्राहकका विभिन्न आवश्यकतासँग सम्बन्धित विविध व्यक्तिगत तथा सामूहिक बीमा योजनाहरू प्रदान गर्दै आइरहेको छ।

आफ्ना ग्राहकहरुमा सर्वसुलभ पहूँच, उत्कृष्ट बीमालेखन, झन्झटमुक्त दाबी र व्यवसाय अनुकुलको समाधान गर्ने लक्ष्य रहेको छ। जीवन बीमाबारेमा जनचेतना वृद्धि गर्ने, जीवन बीमा सुविधाहरुको माध्यमबाट ग्राहकहरुको वित्तीय सुरक्षालाई बढावा दिने तथा राष्ट्रको विकासमा योगदान दिने परिकल्पनाका साथ आइएमइ लाइफ इन्स्योरेन्स
सञ्चालनमा आएको कम्पनिले जनाएको छ।