नुवाकोटमा जताततै बाढी र पहिरो : यातायात अवरुद्ध, गोसाइँकुण्ड मेला भर्न आएका तीर्थयात्रु अलपत्र

नुवाकोट :बाढी र पहिरोले नुवाकोटका विभिन्न स्थानमा क्षति पुगेको छ । बाढीले सडक र पुल बगाउँदा अधिकांश स्थानमा यातायात अवरुद्ध भएको छ । 

नुवाकोटको पूर्वी भेगमा आएको बाढीले पुल बगाउनुका साथै एक जलविद्युत आयोजनमा क्षति पुर्‍याएको छ । बाढीले सातविसेस्थित वुद्धभूमि जलविद्युत आयोजनाको ड्याममा क्षति गरेका कारण विद्युत उत्पादन अवरुद्ध भएको जिल्ला प्रहरी कार्यालय नुवाकोटले जनाएको छ । 

प्रहरी नायब उपरीक्षक रुपक खड्काका अनुसार ड्याममा थुनिएका तीनजना कामदारको उद्धार गरिएको छ । पुलमा क्षति पुगेका कारण छहरे–ढिकुरे सडकमार्ग अवरुद्ध भएको छ । 

यस्तै तादी खोलामा आएको बाढीले विभिन्न स्थानमा क्षति पुर्‍याएको प्रहरीले जनाएको छ । नुवाकोटको दुप्चेश्वर गाउँपालिका ३ राउतवेसी, तादी ४ सातविसे र पञ्चकन्या ४ थप्रेक जोड्ने पुल, पञ्चकन्या २ आपार र तादी ५ वाहुनवेशी जोड्ने पुल र पञ्चकन्या १ को सिमरा फाँट र लिखु गापा ३ सुर्यमति र  ढिकुरे बजार  जोड्ने पुलमा क्षति पुगेको छ।

अवरोध हटाएर यातायात सञ्चालनको पहल भइरहेको जिल्ला प्रशासन कार्यालय नुवाकोटले जनाएको छ । 

प्रमुख जिल्ला अधिकारी नारायणप्रसाद रिसालले सम्बन्धित निकायलाई पहिरो पन्छाउनुका साथै पुलका संरचना मर्मत गरेर यातायात सञ्‍चालनका लागि सम्बन्धित निकायलाई निर्देशन दिइएको बताए । 

यता, तादी खोलामा आएको बाढीले विदुर नगरपालिका देवीघाटस्थित जालपादेवी मन्दिर क्षेत्रमा क्षति गरेको छ । 

बाढीले मन्दिर नजिकै रहेको किरियापुत्री भवनमा समेत क्षति पुग्नुको साथै सितल ताप्ने पाटी बगाएको छ । 

बाढीले जालपादेवी मन्दिर आसपास बनाइएका टहरा तथा संरचनामा क्षति पुगेको छ।सो क्षेत्रमा घरहरु समेत उच्च जोखिममा पारेको स्थानीय युवा नवीन चित्रकारले बताए । मन्दिरको पूर्वतर्फ रहेको हनुमान ढुंगाबाट पर्खाल भत्काएर बाढी पसेर क्षति गरेको उनले बताए । 

बाढीका कारण त्रिदेशीय मार्ग अवरद्ध भएको छ । पहिरोका कारण सडक बगाउँदा त्रिशूली–वेत्रावति–मैलुङ–रसुवागढी तथा पासाङल्हामु सडकमार्ग अन्तर्गत  वेत्रावति–राम्चे सडकखण्ड अवरुद्ध भएको छ ।

पहिरोले रसुवाको उत्तरगया गाउँपालिका- ५ नौविसे नयाँबस्तीमा सात घरमा क्षति पुर्‍याएको छ ।  

पहिरोले स्थानीय मानबहादुर थापामगर, दिपबहादुर थापामगर, विष्णुबहादुर थापामगर, सम्झना घले, कान्छी थापामगर, रवि थापामगर, राजु थापामगरको घरमा क्षति पुगेको वडाध्यक्ष यमनाथ आचार्यले जानकारी दिए । 
पहिरोले पासाङल्हामु सडकमार्ग अन्‍तरगत रसुवाको उत्तरगया ५ वनुवाघुम्तीस्थित सडक बगाउँदा यातायात पूर्णरुपमा ठप्प भएको छ । 

पासाङल्हामु मार्गको वेत्रावति–राम्चे र सोही पहिरोले तल रहेको त्रिदेशिय सडकमार्ग अन्र्तगतको वेत्रावति–मैलुङ–रसुवागढी सडक अवरुद्ध भएको उत्तरगया गाउँपालिकाका अध्यक्ष माधव अर्यालले जानकारी दिए । उनका अनुसार पहिरो पन्छाएर छिटोभन्दा छिटो यातायात सुचारु गर्न सम्बन्धित निकायलाई निर्देशन दिएको  छ। गोसाइकुण्डमा जनैपूर्णीमाका अवसरमा लाग्ने मेलामा गएका तीर्थयात्री बीच बाटोमै रोकिएका छन्।