नागरिकता विधेयक जस्ताको त्यस्तै राष्ट्रपति कार्यालय पठाउने सत्ता गठबन्धनको निर्णय
साउन ३१, २०७९ मंगलबार १३:३०:०
काठमाडौं : सत्ता गठबन्धनको बैठकले नागरिकता विधेयक जस्ताको त्यस्तै प्रमाणकीकरणका लागि पुन: राष्ट्रपति कार्यालयमा पठाउने निर्णय गरेको छ।
मंगलबार प्रधानमन्त्री निवास बालुवाटार बसेको गठबन्धनको बैठकले संसदीय प्रकृया पूरा गरी प्रमाणीकरणका लागि राष्ट्रपति विद्यादेवी भण्डारीकहाँ पठाउने निर्णय गरेको हो।
सरकारका प्रवक्ता ज्ञानेन्द्र बहादुर कार्कीले नागरिकता विधेयक जस्ताको त्यस्तै राष्ट्रपतिकहाँ पठाउने निर्णय भएको बताए।
राष्ट्रपति भण्डारीले आइतबार १५ बुँदै सन्देशसहित पुनरविचार गर्न संसदमा विधेयक फिर्ता गरेकी थिइन्।
आज बसेको प्रतिनिधि सभा बैठकमा प्रतिनिधि सभाका सचिव गोपालनाथ योगीले राष्ट्रपति कार्यालयबाट नागरिकता विधेयक फिर्ता पठाएको सन्देशसहितको पत्र पढेर सुनाएका थिए।
यस्तै शान्ति प्रकृयासम्बन्धी दुईवटा विधेयक मरिमार्जन गरेर मात्र अघि बढाउने निर्णय भएको प्रवक्ता कार्कीले बताए।
सभामुख अग्निप्रसाद सापकोटाले दुवै सदनबाट पास भएको नागरिकता विधेयक साउन १५ गते प्रमाणीकरणका लागि राष्ट्रपतिकहाँ पठाएका थिए। राष्ट्रपतिले आइतबार साँझ विधेयक फिर्ता गरेकी हुन्।
प्रतिक्रिया दिनुहोस !
