बबईमा पानीको बहाव उच्च, काठ-दाउरा संकलन गर्न नजान बर्दिया प्रशासनको आग्रह
भदौ १३, २०७९ सोमबार १४:२५:०
गुलरिया : वर्षात्को बेला बहाव उच्च हुने भएकाले नदीमा बगेर आएका काठदाउरा संकलन नगर्न जिल्ला प्रशासन कार्यालय बर्दियाले अनुरोध गरेको छ ।
जिल्ला विपद् व्यवस्थापन समिति बर्दियाले सूचना जारीगर्दै बबई नदीमा पानीको बहाव बढेकाले काठदाउरालगायत माछा समेत नमार्न सूचित पारेको छ ।
आइतबार रातिदेखि बर्दियाको रानीजरुवा नर्सरी, रम्भापुरलगायतका क्षेत्रमा परेको अविरल वर्षाका कारण बबई नदीको जलस्तर बढेको छ । नेपालको हाइड्रोलोजीले मापन गरेअनुसार २४ घण्टामा १८० मिलिमिटर भन्दा बढी वर्षा भएको जनाइएको छ ।
२४ घण्टामा १४० मिमि वर्षालाई खतरा मानिन्छ । सोमबार बिहान बबई नदीले खतराको तह ६ दशमलव १० मिटर पारगरेको जिल्ला प्रशासन कार्यालय बर्दियाले जनाएको छ । समाचार तयार पारुञ्जेलसम्म नदी सामान्य अवस्थामा पुगीसकेको छ ।
बबई नदीमा बाढी आउन सक्ने भन्दै उच्च सर्तकता अपनाउन प्रशासनले सूचना जारी गरेको निमित्त प्रमुख जिल्ला अधिकारी रमेश पाण्डेयले बताएका छन् ।
उनले भने,' डुवान क्षेत्रका बासिन्दाहरुलाई तोकिएको सुरक्षित स्थानमा सावधानी अपनाउन अनुरोध गरेका छौं ।'
काठदाउरा छोप्ने, माछा मार्ने जस्ता कार्य नगर्न नगराउन पनि अनुरोध गरिएको उनले जानकारी दिए । नदी बढ्न सक्ने भएकाले प्रभावित क्षेत्रका स्थानीयहरुलाई सुरक्षित हुन प्रशासनको आग्रह छ ।
प्रतिक्रिया दिनुहोस !
