परासी : आसन्न मंसिर ४ गते हुने प्रतिनिधि सभा र प्रदेश सभा निर्वाचनका लागि नवलपरासीका प्रमुख राजनीतिक दलसहित सबैजसो दलहरुले आकांक्षी उम्मेदवारको नाम सिफारिस गरिसकेका छन् । अब कसले टिकट पाउँछ भन्नेमा आम सर्वसाधारणमा चासोको विषय बनेको छ ।
जिल्लामा दुई प्रतिनिधि सभा निर्वाचन क्षेत्र र चार प्रदेश सभा निर्वाचन क्षेत्र छन् । गत स्थानीय तहको निर्वाचनको आधारमा यहाँ कांग्रेस बलियो देखिएको छ।
स्थानीय तह निर्वाचनमा वडाअध्यक्षहरुले पाएको मतलाई आधार मान्दा प्रतिनिधि सभा निर्वाचन क्षेत्र नं. २ को प्रदेश सभा (क) मा मात्र एमाले बलियो देखिएको छ । बाँकी दुईवटै प्रतिनिधि सभा र अन्य तीन प्रदेश सभामा नेपाली कांग्रेस बलियो रहेको वडाअध्यक्षहरुले पाएको मतले देखाएको छ ।
प्रतिनिधि सभाको दुईवटै निर्वाचन क्षेत्रको तेस्रो राजनीतिक दलमा राष्ट्रिय प्रजातन्त्र पार्टी देखिएको छ । प्रदेश सभातर्फ राप्रपा दुई स्थानमा तेस्रो छ । त्यसैगरी हृदयेश त्रिपाठी नेतृत्वको जनता प्रगतिशिल पार्टी (जप्रपा) र माओवादी केन्द्र एक/एक प्रदेश सभामा तेस्रो देखिएका छन् ।
वडाअध्यक्षले पाएको मतअनुसार प्रतिनिधि सभा निर्वाचन क्षेत्र नं. १ मा एमालेभन्दा कांग्रेस ३ हजार ५६३ मतले अघि छ । सो निर्वाचन क्षेत्रमा कांग्रेसले कुल ३० हजार ३४२ मत पाएको छ । एमालेले कुल २६ हजार ७७९ मत पाएको छ । त्यसैगरी तेस्रो स्थानमा राप्रपा र चौथो स्थानमा माओवादी केन्द्र रहेको छ ।
त्यसैगरी प्रतिनिधि सभा निर्वाचन क्षेत्र नं. १ को प्रदेश सभा (क) तर्फ नेपाली कांग्रेस एमालेभन्दा १ हजार ८८ मतले अघि छ । नेपाली कांग्रेसको १९ हजार २४३ मत छ भने एमालेको १८ हजार १५५ छ । तेस्रो स्थानमा राप्रपा र चौथो स्थानमा माओवादी केन्द्र रहेको छ । त्यस्तै सोही निर्वाचन क्षेत्रको प्रदेश सभा (ख) तर्फ पनि नेपाली कांग्रेस एमालेभन्दा २ हजार ४७५ मतले अघि छ । नेपाली कांग्रेसको ११ हजार ९९ मत छ भने एमालेको ८ हजार ६२४ छ । तेस्रो स्थानमा हृदयेश जनता प्रगतिशिल पार्टी र चौथोमा राप्रपा छ ।
प्रतिनिधि सभा निर्वाचन क्षेत्र नं. २ मा एमालेभन्दा नेपाली कांग्रेस ३ हजार ४१० मतले अघि छ । नेपाली कांग्रेसको ३१ हजार ५४६ मत छ भने एमालेको २८ हजार १३६ मत रहेको छ । सो निर्वाचन क्षेत्रमा राप्रपा तेस्रो र माओवादी केन्द्र चौथो छ ।
प्रतिनिधि सभा निर्वाचन क्षेत्र नं. २ को प्रदेश सभा (क) तर्फ नेपाली कांग्रेसभन्दा एमाले २ हजार ३०४ मतले अघि छ । एमालेले १४ हजार ६३० मत ल्याउँदा कांग्रेसले १२ हजार ३२६ मत ल्याएको छ । तेस्रो स्थानमा राप्रपा र चौथो स्थानमा माओवादी केन्द्र छ ।
सोही निर्वाचन क्षेत्रको प्रदेश सभा (ख) तर्फ एमालेभन्दा नेपाली कांग्रेस ४ हजार १२० मतले अघि छ । नेपाली कांग्रेसले १० हजार ३३९ मत ल्याउँदा एमालेले ६ हजार २१९ मत ल्याएको छ । तेस्रो स्थानमा माओवादी केन्द्र र चौथो स्थानमा जनता समाजवादी पार्टी छ । जिल्लामा मधेसी दलहरुको उपस्थिति रहेपनि उनीहरुको मत भने न्यून छ ।
प्रतिक्रिया दिनुहोस !
