भक्तपुर : भक्तपुरको मध्यपुर थिमि नगरपालिका क्षेत्रमा बागमती प्रदेश सरकारको सहयोगमा अति विपन्न आवास कार्यक्रम अन्तर्गत चारवटा परिवारका लागि आवासको व्यवस्था भएको छ । मंगलबार एक कार्यक्रम गरी बागमती प्रदेश सांसद् डा. राजेन्द्रमान श्रेष्ठले आवासको साँचो हस्तान्तरण गरेका छन् ।
बागमती प्रदेश सरकारबाट १७ लाख २० हजार सहयोग अनुदानमा मध्यपुर थिमि नगरपालिकाभित्र वडा नं. ८ बोडेमा १, वडा नं. ७ नगदेशमा १, वडा नं. ६ चपाचोमा १ र वडा नं. ५ ताहाननीमा १ गरी चारवटा आवास निर्माण सम्पन्न गरी साचो हस्तान्तरण गरिएको हो ।
कार्यक्रममा डा. श्रेष्ठले बागमती प्रदेशमा विगतमा पनि मध्यपुर थिमिमा चार विपन्न परिवारलाई आवास निर्माण गरी हस्तान्तरण गरेको स्मरण गरे । यसवर्ष पनि चार परिवारलाई आवास हस्तान्तरण गर्न पाएकोमा उपभोक्ता समितिका अध्यक्षलगायत सदस्यहरु एवं स्थानीयबासीहरुलाई उनले धन्यवाद दिए ।
आ.व. २०७९/८० को योजनामा पनि यस कार्यक्रमलाई निरन्तरता दिन खोजेको तर विभिन्न कारणले गर्दा सफल हुन नसकेको उनले बताए । जनता जाग्यौं भने त्यसलाई निरन्तरता दिन सक्ने विश्वास उनले व्यक्त गरे । यो कार्य मानवीय सेवामा महत्वपूर्ण पुण्यको कामको रुपमा ठानी भोलिका दिनहरुमा पनि सहयोग गर्ने बचनवद्धता उनले व्यक्त गरे ।
उपभोक्ता समितिका अध्यक्ष रमेश प्रजापतिले मध्यपुर थिमिमा अझै पनि थुप्रै विपन्न परिवारहरु रहेको जनाए । उनीहरुका लागि आवासको अभावमा समस्या भइरहेकोले आगामी आर्थिक वर्षमा यो योजनालाई निरन्तरता दिन माग रहेको प्रजापतिले बताए ।
प्रतिक्रिया दिनुहोस !
