काठमाडौं : राष्ट्रिकवि माधव घिमिरेको अन्तिम कृति ऋतंभरा महाकाव्य लोकार्पण गरिएको छ।
शुक्रबार काठमाडौंमा सम्पन्न एक समारोहमा प्रमुख अतिथि नेपाल प्रज्ञा प्रतिष्ठानका कुलपति गंगाप्रसाद उप्रेती, राष्ट्रपति घिमिरेकी पत्नी महाकाली घिमिरे, साहित्यकार रमा शर्मा र राष्ट्रकविका कृतिमा विद्यावारिधी गर्ने डा. लेखप्रसाद निरौलालगायतले उक्त कृतिको लोकार्पण गरेका हुन्।
नेपाल शिक्षा परिषद् तथा साझा प्रकाशनको संयुक्त आयोजनामा भएको विमोचन समारोहमा प्रमुख अतिथि उप्रेतीले उक्त पुस्तक लामो प्रतिक्षापछि आएकोमा पुस्तक प्रकाशनमा महत्वपूर्ण भूमिका निभाएका राष्ट्रकविका परिवारका सदस्यलाई धन्यवाद दिए।
उनले भने, 'यो पुस्तकको प्रतिक्षा गरेको धेरै भएको थियो। कसरी कोबाट कहिले आउँछ भन्ने प्रतिक्षा हामीलाई थियो। आज त्यो प्रतिक्षाको घडी सकिएको छ। कृति पाठकमाझ आएकोमा हामी निकै खुसी भएका छौं।'
कार्यक्रममा राष्ट्रकविकी छोरी शान्ति अधिकारीले पुस्तक तयार पार्ने क्रममा बुवासँग जोडिएका पलहरूको स्मरण गर्दै कविता वाचन गरिन्।
बुवाकै प्रेरणाले संगीतमा लागेकी अधिकारीले ऋतंभराका केही श्लोकमा संगीत भरेकी छन्। राष्ट्रकवि घिमिरेको शोककाव्य गौरीकी पात्र मध्येकी शान्ति एक हुन् भने अर्की पात्र उनकी बहिनी कान्ति घिमिरे न्यौपाने पनि कार्यक्रममा उपस्थित थिइन्।
राष्ट्रकविका छोरा राजिब घिमिरेले पहिले बुवाको अक्षर मोतिका दाना जस्ता अत्यन्तै सुन्दर रहेको बताए। तर विस्तारै हात काप्न थालेपछि अक्षर बिग्रदै गएको उनले बताए।
घिमिरेले बुवाले उक्त कृतिमा साहित्यरूपी महासागरबाट मोति टिपेर ल्याएर राखेका प्रतिक्रिया दिए। बुवाले आफ्नो अन्तिम अवस्थामासमेत आफ्नो यो इच्छा पूरा नहुने हो कि भनेर चिन्ता व्यक्त गरेका बताए।
जसरी राष्ट्रकवि घिमिरे सम्पूर्ण साहित्यप्रेमी माझ अमर रहे, त्यसरी नै बुवाको अरू कृतिजस्तै यो पनि अमर रहोस् भन्ने उनले कामना गरे।
पेसाले इन्जिनियर रहेका उनले उक्त कृतिलाई आफ्नो आमाको इच्छाअनुसार आठै सन्तानले नै लागि परेर प्रकाशन गरेको बताए।
उनले भने, 'बुवाले लेखेर पोका पोका पारेर राख्नुभएका कृतिलाई हामी आठ जना छोराछोरीले समेटेर प्रकाशन गर्यौं। यसलाई प्रकाशनका लागि धेरैले मागेका थिए। तर आमाको इच्छानुसार यो काम हामीले नै सम्पन्न गर्यौं।'
राष्ट्रकवि घिमिरेकै विषयमा विद्यावारिधी गरेका डा. निरौलाले राष्ट्रकवि घिमिरेको यस कृतिले नेपालको शिर उचो बनाएको बताए।
राष्ट्रकवि घिमिरेको शकुन्तला, मालती मंगले, हिमालपारि हिमालवारिलगायतका गीतिनाटक, आफ्नो बाँसुरी आफ्नै गीत, चारु चर्चालगायका निबन्ध र बाला लहरी, बिजुले र बिजुलालगायतका बालरचना छ।
उनका इन्द्रकुमारी, किन्नर किन्नरी, गौरी, चैत वैशाख, राजेश्वरी, राष्ट्रनिर्माता र विषकन्या लगायतका कृति पनि निकै चर्चित छन्।
प्रतिक्रिया दिनुहोस !
