बैतडी : बैतडीको पुर्चौडी नगरपालिका-८ डणपुरमा घरमा आगलागी हुँदा एक वृद्धा घाइते भएकी छन् भने घर पूर्णरुपमा जलेर नष्ट भएको छ। आज दिउसो भान्साकोठाको चुलोमाथि सुकाउन राखेको दाउरबाट सल्किएको आगोले घर जलेर पूर्णरुपमा नष्ट भएको हो।
आगलागीबाट ८४ वर्षीया वृद्धा जयमती साउँद पनि गम्भीर घाइते भएकी छन्। स्थानीयका अनुसार खाना बनाएर चुलोमाथि सुकाउन राखेको दाउराबाट आगो सल्किएको थियो। घरभित्रै सुतिरहेको अवस्थामा आगो लागेको थाहा पाएकी जयमती घरभित्रबाट भागेर बाहिर आउँदासम्म जलेर घाइते भएकी वडा नं ८ का वडा अध्यक्ष वीरबहादुर बोहराले बताए।
आगोले घर पूर्णरुपमा क्षति भएपछि अप्रान्ह ४ बजे आगालगीको घटनाबारे प्रहरीले खबर पाएको थियो। घाइते साउँदलाई उपचारका लागि धनगढी लगिदैछ। उनको पिठ्यु, अनुहार, हात र खुट्टाका भागहरू आगोले जलेका छन्।
पाँच वर्ष पहिले श्रीमान गुमाएकी जयमती छोरीसँगै बस्दै आएकी थिइन्। छोरी खर काट्न गएकोबला आगालागीको घटना भएको थियो।
स्थानीयहरूका अनुसार आगलागीबाट नगदसहित २ लाख बढीको क्षति भएको परिवारले जनाएको छ।
प्रतिक्रिया दिनुहोस !
