सगरमाथा क्षेत्रको पर्यटन लयमा फर्किदै : १५ महिनामा ३२ हजार बढीले गरे भ्रमण

सोलुखुम्बु : कोरोना कहरका कारण थलिएको सगरमाथा क्षेत्रको पर्यटन व्यवसाय विस्तारै लयमा फर्किन थालेको छ । कोरोना संक्रमणका कारण भएको लकडाउनले झण्डै दुई वर्षसम्म पर्यटक आवगमन ठप्प बनेको खुम्बु क्षेत्रमा पर्यटकको चाप विस्तारै बढ्न थालेको हो । 

मुलुकको प्रमुख पर्यटकीय गन्तव्य यस क्षेत्रमा लकडाउनपछि ३२ हजार बढी पर्यटक भ्रमणका लागि पुगेको सगरमाथा राष्ट्रिय निकुञ्जको कार्यालय नाम्चे सोलुखुम्बुले जनाएको छ । 

कार्यालयका सूचना अधिकारी विष्णु रोकायका अनुसार २०७८ को असारदेखि हालसम्म ३२ हजार ६ सय ५८ जना पर्यटकले सो क्षेत्रको भ्रमण गरेका छन् । जसमा २६ हजार ६ सय ३८ विदेशी र ६ हजार २० जना नेपाली रहेका छन् । 

पर्यटन गतिविधि चलायमान भएसँगै सो क्षेत्रका व्यवसायीहरु समेत उत्साहित बनेको लुक्लाका होटल व्यवसायी कामी शेर्पाले बताइन् । सन् १९५३ मा भएको प्रथम सगरमाथा आरोहण यता पहिलोपटक कोरोनाको कहरको चपेटामा सगरमाथा क्षेत्र परेको थियो ।

 सन २०२० र २०२१ मा खुम्बु क्षेत्र लगभग सुनसान नै बनेको थियो । सो समयमा होटल मजदूर, पथप्रदर्शक, भरिया र ट्रेकिङ एजेन्सी लगायतले काम गुमाएका थिए । तर सन् २०२२ बाट भने विस्तारै पर्यटन क्षेत्र लयमा फर्किदा पर्यटन व्यवसायीलाई राहत मिलेको व्यवसायी सुबास बस्नेतको भनाइ छ । 

थला परेको पर्यटन क्षेत्रलाई विशेष प्याकेजका साथ अघि लैजाने सवालमा सरकारसँग छलफल भइरहेको ट्रेकिङ एजेन्सिज एसोसियसन अफ नेपाल (टान) का अध्यक्ष निलहरी बास्तोलाले बताए ।