गुलरिया : बर्दियाको गुलरिया नगरपालिका र बारबर्दिया नगरपालिकासँगै पूर्वपश्चिम राजमार्ग जोड्ने बबई नदीको जब्दीघाटमा निर्मित भाँसिएको पक्की पुल बाढीले बगाउँदा दुई पालिका बीचको आवागमन अवरुद्ध भएको छ ।
पाँच वर्षअघि बबई नदीको बाढीले क्षति पुर्याएको पुलको स्ल्याब पुन बाढीले बगाएपछि राजमार्गसँगै दुई पालिका बीचको छोटो दुरीको आवागमन बन्द भएको हो ।
हस्तान्तरण नहुँदै बबईको बाढीले पुल भाँसिएपछि निर्माण कम्पनी पप्पु कन्ट्रक्सनविरुद्ध अख्तियारमा उजुरी परेको थियो । लामो समयको अख्तियारको छानविन पछि पुल निर्माण कम्पनीले नै डिजाइन अनुसारको पुल तयार गरी सरकारलाई बुझाउने सहमति भएअनुसार निर्माण कम्पनीले पुलको क्षतिग्रस्त संरचना निर्माणको थालनी गरेको थियो ।
मंगलबारदेखि परेको अविरल वर्षाका कारण बबई नदीमा आएको बाढीले पुलको क्षतिग्रस्त स्ल्याव बगाएको प्रमुख जिल्ला अधिकारी बन्धु प्रसाद बास्तोलाले बताए ।
पुल क्षतिग्रस्त र जोखिम युक्त भएपनि दुई पालिकालाई छोटो दुरीको रुपमा हल्का सवारी साधन र मानिसको आवतजावतमा सहजता पुर्याइरहेको थियो । उनले भने ,'बाढीले पुलको स्ल्याब बगाउँदा बारबर्दिया र गुलरिया नगरपालिका बीचको आवागमन टुटेको छ । हामीले तत्काल विपद व्यवस्थापन समितिको बैठक बसी सडक विभागलाई पुल मर्मत गरी संचालनमा ल्याइदिन अनुरोध गर्ने निर्णय गरेका छौं । सम्बन्धित सरोकारवालाहरुको पनि पुल मर्मतका लागि ध्यानाकर्षण गराउँछौं।'
क्षतिग्रस्त भएका कारण साइकल, मोटारसाइकललगायतका सवारी साधन तथा मानवीय आवागमन बन्द भएको छ ।
पुल पूर्णरुपमा क्षति भएपछि दुई पालिकाको दुरी बढेको छ । नदीमा पुन: डुंगा सञ्चालन गर्नुपर्ने अवस्था आएको छ । पुल बगेपछि स्थानीयहरु चिन्तित बनेका छन् । राजमार्ग र बारबर्दिया नगरपालिका पुग्ने छोटो दुरीमा रहेको पुल बग्दा हामी मर्कामा पर्यौं गुलरिया नगरपालिका वडा नम्बर ४ निवासी रंगीलाल थारुले भने । उनले भने,'बाढी सकिने वित्तिकै पुल बनाउनुपर्यो । पुलका कारण हामी थप पीडित भएका छौं । पुल बनेदेखि नै हामीले पुलको राम्रो अवस्था कहिल्यै सदुपयोग गर्न पाएनौं ।'
प्रतिक्रिया दिनुहोस !
