पहिरोले कुलो बगाएपछि सन्धिखर्कमा ७ सय रोपनी खेत सिंचाइविहीन
असोज २२, २०७९ शनिबार १६:४७:०
सन्धिखर्क : अर्घाखाँचीको सन्धिखर्क १० जलजलेमा पहिरोले २ वटा कुला बगाएको छ।
खेतमा सिंचाइ हुने कुला पहिरोले लगेपछि स्थानीय कृषकहरु चिन्तित बनेका छन् । फुल खेल्न लागेको धानमा सदाभन्दा बढी पानी चाहिने अवस्थामा कुलो पहिरोले बगाएपछि कृषकहरू चिन्तित बनेका हुन् ।
पहिरोले कुलो बगाएपछि साठीको जलजले सिंचाइ कुलोको २ सय रोपनी र माझको कुलोको झन्डै ५ सय रोपनी खेत सिंचाइविहीन बनेको हो ।
जलजलेमा गएको पहिरोले जलजले सारनटारी धरमपानी कृषि सडक पनि अवरुद्ध भएको छ । स्थानीय मानिसहरु पैदल पनि हिँड्न नसक्ने गरी गएको पहिरोले कृषकहरुले दूध र तरकारी समेत सन्धिखर्क र चुत्राबेसीमा ल्याउन सकेका छैनन् ।
बाटो अवरुद्ध भएपछि दूध समेत बिक्री गर्न बजारमा लैजान नसकेको स्थानीय कृषक गोविन्द बन्जाडेले बताए । घोचेखोला हुँदै आपखोला जाने सडक घोचेखोलाले कटान गरेपछि बाटो पूर्णरुपमा अवरुद्ध बनेको छ ।
सन्धिखर्क किमडाडा, धारापानी, प्युठान सडक, सन्धिखर्क, खिल्जी, जैटारी, प्युठान सडक, सन्धिखर्क बलकोट तम्घास सडक, गच्छे, धनचौर, भालुबांग सडक पनि ठाउँठाउँमा गएको पहिराले अवरुद्ध भएको छ ।
प्रतिक्रिया दिनुहोस !
