भक्तपुर : आगामी मंसिर ४ गते हुने प्रतिनिधि सभाको दुई सदस्यका लागि भक्तपुरमा ४० जनाको उम्मेदवारी परेको छ। प्रतिनिधि सभामा भक्तपुर क्षेत्र नं. १ र २ छन्। यी दुई सदस्यका लागि विभिन्न पार्टी र स्वतन्त्र गरी ४० जनाको उम्मेदबारी परेको हो।
भक्तपुर क्षेत्र नम्बर–१ बाट प्रतिनिधि सभा सदस्यमा ४ जना स्वतन्त्रसहित १४ जनाको उम्मेदबारी परेको छ। भक्तपुर क्षेत्र नम्बर–२ बाट ११ जना स्वतन्त्रसहित २६ जनाले उम्मेदवारी दर्ता गराएका हुन्।
भक्तपुर क्षेत्र नं १ मा नेपाल मजदुर किसान पार्टीबाट पार्टी सचिव प्रेम सुवाल, सत्ता गठबन्धनबाट माओवादी केन्द्रका सुनिल गोठे, नेकपा एमालेबाट नवराज गेलाललगायतको उम्मेदवारी परेको छ।
भक्तपुर क्षेत्र नं २ मा नेकपा एमालेका युवा नेता महेश बस्नेत, नेपाली कांग्रेस जिल्ला समिति भक्तपुरका सभापति दुर्लभ थापा, नेपाल मजदुर किसान पार्टीबाट अनुराधा थापामगरलगायतको उम्मेदवारी परेको छ। यीमध्ये बस्नेत र थापामगर संविधानसभाका पूर्व सदस्य हुन्।
भक्तपुरको दुवै क्षेत्रमा मुख्य प्रतिस्पर्धी पार्टीहरु नेमकिपा, एमाले र कांग्रेस नै हुन्। पछिल्लो स्थानीय निकायको निर्वाचनलाई विश्लेषण गर्ने हो भने भक्तपुर क्षेत्र नं १ नेमकिपाको गढको रुपमा रहेको छ भने क्षेत्र नं २ मा एमाले र कांग्रेसबीच कडा प्रतिस्पर्धा हुने देखिन्छ।
भक्तपुर क्षेत्र नं १ मा नेमकिपाकोतर्फबाट क्षेत्र नं १ क (चाँगुनारायण) मा पार्टीका युवा नेता मिनबहादुर बाटा र क्षेत्र नं १ ख (भक्तपुर) मा पार्टी जिल्ला अध्यक्ष सुरेन्द्रराज गोसाईको उम्मेदवारी परेको छ।
सत्ता गठबन्धनको तर्फबाट भक्तपुर क्षेत्र नं १ क (चाँगुनारारायण) मा कांग्रेसका सुरेश श्रेष्ठ र क ख (भक्तपुर) मा कांग्रेसकै पवन भुजुको उम्मेदवारी परेको छ।
यस्तै एमालेबाट भक्तपुर क्षेत्र नं १ क (चाँगुनारायण) मा मोहनवीर श्रेष्ठ र १ ख (भक्तपुर) मा नारायणसुन्दर सिन्ताकलको उम्मेदबारी परेको छ।
उता सता गठबन्धनबाट भक्तपुर क्षेत्र नं २ क (सूर्यविनायक) मा नेपाली कांग्रेसका विष्णुराज कार्कीको उम्मेदवारी परेको छ। गठबन्धनको तर्फबाट भक्तपुर क्षेत्र नं २ ख (मध्यपुर थिमि) मा नेकपा एसका डा. राजेद्रमान श्रेष्ठको उम्मेदबारी परेको छ। यस्तै एमालेबाट २ क (सूर्यविनायक) मा किरण थापा र २ ख (मध्यपुर थिमि) मा चन्द्रकृष्ण श्रेष्ठको उम्मेदवारी परेको छ।
भक्तपुर क्षेत्र नं १ मा कूल एक लाख दुई हजार पाँच सय २८ र क्षेत्र नं. २ मा ९१ हजार नौ सय ११ जना मतदाता रहेका छन्। क्षेत्र नं. १ मा एक सय १५ मतदान केन्द्र छन् भने २ मा एक सय सात मतदान केन्द्रहरु छन्।
प्रतिक्रिया दिनुहोस !
