युक्रेनका धेरै सहरहरूमा क्षेप्यास्त्र प्रहार
युक्रेन : राजधानी किभसहित कैयौं युक्रेनी सहरहरूमा सोमबार भएका क्षेप्यास्त्र आक्रमणमा परी कम्तिमा पाँच जनाको मृत्यु भएको छ भने १२ घाइते भएका राष्ट्रिय प्रहरी स्रोतले जानकारी दिएको छ।
रुसले किभमा ठूला हमलाहरु गरेको र अधिकांश क्षेप्यास्त्र राजधानीको केन्द्रमा परेका जनाइएको छ। मस्कोले जोड्ने पुलमा विस्फोटको लागि युक्रेनलाई दोष लगाएको एक दिनपछि यसप्रकार क्षेप्यास्त्र प्रहार भएको जनाइएको छ।
देशका धेरै सहरहरूमा क्षेप्यास्त्र आक्रमणको चपेटामा रहेका र जनतालाई आश्रयमा बस्न युक्रेनका राष्ट्रपति कार्यालयका उपप्रमुख किरिलो टिमोशेन्कोले सामाजिक सञ्जालमा आह्वान गरेका छन्। किभमा रहेका एएफपी संवाददाताहरूले स्थानीय समयानुसार सोमबार बिहान ८:१५ बजे ठूलो विस्फोटहरू भएको बताएका छन्।
एक क्षेप्यास्त्र बालबालिकाको खेल मैदाननजिकै अवतरण भएको एएफपी पत्रकारले जानकारी दिए। त्यो स्थानमा रहेको ठूलो खाडलबाट धुवाँ निस्किरहेको जनाइएको छ। युक्रेनको राजधानीमा रुसी आक्रमण जारी रहेको र सहरको केन्द्रहरुमा क्षेप्यास्त्र प्रहार भएका मेयर भिटाली क्लिट्स्कोले सामाजिक सञ्जालमा बताए।