भक्तपुर : भक्तपुरको आदर्शमा शुक्रबारदेखि तिहार विशेष रमाइलो मेला सुरु भएको छ। आदर्शको सूर्यविनायक हरित कृषि तथा थोक बजारभित्र सस्तो बजारको शुभारम्भ एवं सूर्यविनायक हरित कृषि तिहार विशेष रमाइलो मेला २०७९ सुरु भएको हो।
सूर्यविनायक हरित कृषि तथा थोक बजारको आयोजनामा मेला सुरु भएको हो। मेला कार्तिक ९ गतेसम्म चल्ने छ।
मेलाका क्रममा दैनिक विभिन्न राष्टिय कलाकारहरूबाट गीत, संगीत, नृत्यमार्फत मनोरञ्जन गराउने कार्यक्रम रहेको जनाइएको छ।
प्रत्येक दिन बिहान साढे ११ बजेदेखि राति साढे सात बजेसम्म मनोरञ्जनात्मक कार्यक्रम हुने जनाइएको छ। यस क्रममा गीत संगीतबाट मनोरञ्जन लिन सकिने र सस्तो बजारबाट आफूलाई आवश्यक सामानहरू खरिद गर्न सकिने छ।
साथै तरकारी बजारबाट थोक मूल्यमा तरकारी पनि खरिद गरेर लान सकिने जनाइएको छ। मेलामा सहभागी हुन प्रतिव्यक्ति ५० रुपैयाँ टिकट दर रहेको छ। साथै विद्यार्थीका लागि प्रतिव्यक्ति ३० रुपैयाँ प्रवेश शुल्क राखिएको छ।
मेलामा वृद्धवृद्धा, अपांग, पत्रकार आदिका लागि निःशुल्क प्रवेशको व्यवस्था गरिएको जनाइएको छ।
प्रतिक्रिया दिनुहोस !
