विनोद चौधरी र हृदयेश त्रिपाठीको कडा टक्कर, माओवादीलाई फकाउन दौडधुप

परासी: अर्बपति विनोद चौधरी र जनता प्रगतिशिल पार्टी (जप्रपा)का अध्यक्ष हृदयेश त्रिपाठी नवलपरासी पश्चिमको निर्वाचन क्षेत्र नं. १ बाट प्रतिनिधिसभा सदस्यको निर्वाचनमा प्रतिस्पर्धी उम्मेदवारका रुपमा चुनावी मैदानमा छन् ।

जिल्लाको अन्य क्षेत्रको चुनावी अंक गणितबारे विभिन्न आँकलन र टिप्पणी भइरहे पनि चौधरी र त्रिपाठीको निर्वाचन क्षेत्रको चुनावी अंक गणित आँकलन गर्न कठिन भएको स्थानीय बताउँछन् ।

नेपाली कांग्रेसका उम्मेदवार चौधरीलाई कांग्रेसभित्रकै असन्तुष्ट नेता मनाउन कठिन देखिएको छ भने त्रिपाठीलाई समर्थक एमालेका नेता कार्यकर्तालाई मनाउन हम्मे हम्मे छ ।

एमालेसँगको तालमेलमा सूर्य चिन्हबाट उठ्न आग्रह गर्दा त्रिपाठीले मानेका थिएनन् । जसले एमालेजन र त्रिपाठीबीच केही खटपट नै देखियो । उम्मेदवारी दर्ताको दिन त्रिपाठीले आफ्नै दल जप्रपाको चुनाव चिन्ह ‘कोदाली बोकेको किसान’सहित उम्मेदवारी दर्ता गरेपछि एमालेले पनि आफ्नो उम्मेदवार उठायो । तर केन्द्रीय नेतासँगको वार्तापछि एमालेले उम्मेदवारी फिर्ता लिएर त्रिपाठीलाई सघाउने निर्णय गरे पनि त्यतिबेला फाटेको सम्बन्ध अझै सुमधुर भएको छैन ।

यसअघि (२०७४) को चुनावमा सूर्य चिन्ह लिएर जितेका त्रिपाठीलाई अहिले केही एमाले कार्यकर्ता त्रिपाठीको चुनाव चिन्हमा सहज रुपले मत हाल्ने मनस्थितिमा अझै छैनन् । यद्यपी एमालेका जिल्ला नेता पार्टीले समर्थन गरेकाले त्रिपाठीलाई नै सघाउन भन्दै कार्यकर्ता मनाइरहेका छन् । 

यो निर्वाचन क्षेत्रमा दलका ११ र ७ स्वतन्त्र गरी १८ जनाले प्रतिनिधिसभा सदस्यमा उम्मेदवारी दिएका छन् । उम्मेदवारको संख्या धेरै भए पनि चुनावी प्रतिस्पर्धा त्रिपाठी र चौधरीबीच नै बढी हुने आँकलन स्थानीयको छ ।

यता उद्योगपति चौधरीले जिल्लाका नेतालाई बाइपासगर्दै पार्टी सभापति एंव प्रधानमन्त्री शेरबहादुर देउवाको बलमा टिकट ल्याएपछि कांग्रेसभित्र पनि ब्यापक असन्तुष्टि छ ।

पार्टीभित्रको असन्तुष्टिबाहेक गठबन्धनको सहमति विपरीत कांग्रेसले त्यस क्षेत्रको प्रदेशसभा ‘ख’मा उम्मेदवारी दिएपछि गठबन्धनकै खटपटले पनि चौधरीलाई चुनाव आफ्नो पक्षमा पार्न त्यति सहज नदेखिएको चर्चा जिल्लाको राजनीति वृत्तमा छ । 

प्रदेशसभा ‘ख’माओवादी केन्द्रको भागमा परेपनि कांग्रेसले उम्मेदवारी दिएपछि त्यहाँ खटपट छ । त्यस क्षेत्रमा प्रभावशाली नेता कांग्रेस लुम्बिनी प्रदेशका महामन्त्री विक्रम खनाल अहिले चौधरीको चुनावी कार्यक्रममा सहभागी भएका छैनन् । उनी टिकटका दाबेदार थिए । खनालको अनुपस्थितिले पनि चौधरीलाई थप चुनौती थपेको कांग्रेस कार्यकर्ताले बताउँदै आएका छन् ।

चौधरी २०६४ को संविधानसभा निर्वाचनमा एमालेबाट र २०७४ मा कांग्रेसबाट समानुपातिक सांसद बनेका थिए । हाल उनी कांग्रेस केन्द्रीय सदस्यसमेत छन् । पहिलो पटक प्रत्यक्षतर्फको चुनावी अनुभव बटुल्दै मैदानमा उत्रिएका चौधरीलाई यस निर्वाचन क्षेत्रबाट २०४८ सालदेखि भएका सबै निर्वाचनमा जित हासिल गरेका त्रिपाठी ठूलो चुनौती हुन् । त्रिपाठीलाई पछि पार्न चौधरीलाई त्यति सहज छैन ।

गएको स्थानीय तह निर्वाचनको मत परिणामअनुसार त्रिपाठीको दलको उपस्थिति न्यून छ । तर एमालेसँगको तालमेलले त्रिपाठीले सत्ता गठबन्धनसँग कडा प्रतिस्पर्धा गर्नेछन् । 

स्थानीय तह निर्वाचनको मतअनुसार यो निर्वाचन क्षेत्रमा जप्रपाको ४ हजार ६८१ र एमालेको २६ हजार ७७९ मत छ । एमालेसँग तालमेल गरेको अर्को घटक जसपाले त्यस निर्वाचन क्षेत्रमा पनि एमालेकै उम्मेदवारलाई सघाउने जनाएको छ । जसपाको मत ३ हजार ५ सय ३९ मत छ । तीन दलको मत जोड्दा त्रिपाठीको पक्षमा ३४ हजार ९९९ पुग्छ । 

नेपाली कांग्रेसले पाएको मत ३० हजार ३४२ छ । गठबन्धनको घटक एकीकृत समाजवादीको १ हजार १४१ र राष्ट्रिय जनमोर्चाको २६० गरी चौधरीको पक्षमा कुल ३१ हजार ७४१ मत छ । सत्ता गठबन्धनको अर्को घटक माओवादी केन्द्र सहमतिविपरीत कांग्रेसले प्रदेशसभामा उम्मेदवारी दिएको भन्दै असन्तुष्ट जनाएपछि स्थानीय तहमा माओवादी केन्द्रले पाएको कुल ५ हजार ३३९ मत कता जान्छ अन्यौल मै छ ।

यद्यपी गठबन्धनका जिल्ला नेताहरु यो विवाद मिलाउने कसरतमा छन् । माओवादीको मत कतै पनि नजोड्दा चौधरीभन्दा त्रिपाठी  ३ हजार २५८ मतले अघि छन् । माओवादीको मत कांग्रेसतर्फ जोड्दा त्रिपाठीभन्दा चौधरी २ हजार ९३ मतले अघि हुन्छन् । स्थानीय तहको मतअनुसार चौधरी र त्रिपाठी कस्लाई जिताउने भन्ने निर्णायक मत माओवादी केन्द्रमा छ । 

त्यसो त २०७४ को चुनावलाई फर्केर हेर्दा सूर्य चिन्हबाट चुनाव लड्दा त्रिपाठीले नेपाली कांग्रेसलाई ५ हजार १ मतले पराजित गर्दै विजयी भएका थिए । त्यसैले पनि त्रिपाठी र चौधरीको प्रतिस्पर्धालाई मतदाताले समेत कसको पल्लाभारी कता भन्ने सहज आँकलन गर्न सकेका छैनन् ।