प्रेम सुवालसँग भिड्न गेलाललाई सकस !
भक्तपुर: नेपाल कम्युनिष्ट पार्टी एमालेबाट भक्तपुर क्षेत्र नं १ को प्रतिनिधि सभाका उम्मेदबार नवराज गेलाल त्यस क्षेत्रमा उम्मेदबार बन्न चाहेकै थिएनन्। उनको योजना भक्तपुर-१ 'क' को उम्मेदवार बन्ने थियो।
प्रदेशको मात्रै आशा गरेका उनले प्रतिनिधि सभाकै टिकट पाउँदा उनीमात्र होइन उनका समर्थक पनि दु:खी छन् ।
गेलाललाई एमालेले प्रतिनिधि सभाको उम्मेदवार बनाउँदा उनका समर्थकले एमालेकै बिरोध गरेका छन् । बिरोधमात्र होइन, एमालेले प्रदेशसभामा उठाएका उम्मेदवारलाई भोट नै नदिने चेतावनी पनि दिएका छन् ।
तीन सय घरधुरीको दाहाल गाउँ र एक सय घरधुरीका गेलाल गाउँले नवराज गेलाललाई किन प्रदेशसभाको टिकट नदिएको भन्ने प्रश्न एमालेलाई सोध्ने गरेका छन् ।
प्रतिनिधि सभाको टिकट दिए पनि प्रदेश सभाकै टिकट चाहनुको मुख्य कारण हो भक्तपुर क्षेत्र नं १ नेपाल मजदुर किसान पार्टी (नेमकिपा) को गढ हुनु । यस क्षेत्रमा अरु पार्टीको उम्मेदवारी हार्नकै लागि भन्ने मान्यता छ । हार्ने ठाउँमा प्रतिनिधि सभाको उम्मेदवारी पाउनुको साटो जित्ने ठाउँको प्रदेश सभाको उम्मेदवारीको खोजिमा थिए गेलाल ।
२०७४ को प्रतिनिधिसभा निर्वाचन परिणाम र गतवर्ष सम्पन्न स्थानीय तहको निर्वाचन परिणामलाई आधार मान्दा नेमकिपा बाहेकका दलहरूले यस क्षेत्रमा जित्ने आशा कम गर्छन ।
गत स्थानीय तहको निर्वाचनमा वडाध्यक्षले ल्याएको मतको आधारमा भक्तपुर-१ मा नेमकिपाको मत ३३ हजार ८९५ छ भने एमालेको १४ हजार ११९ छ । यसैगरी कांग्रेसले १३ हजार १३ मत ल्याउँदा राष्ट्रिय प्रजातन्त्र पार्टीले ६ हजार २८६ ल्याएको छ । माओवादीले एक हजार ३८८ मत पाएको छ ।
नेमकिपाबाट उम्मेदवार बनेका प्रेम सुवालसँग प्रतिष्पर्धा गर्न एमालेका गेलाल तथा सत्ता गठबन्धनबाट उम्मेदवार बनेका सुनिल गोठेलाई सकस छ ।
२०७४ को प्रतिनिधिसभाको निर्वाचनमा भक्तपुर-१ मा नेमकिपाका प्रेम सुवाल झण्डै दोब्बर मतान्तरले विजयी भएका थिए । सुवालले ३३ हजार ७६ मत ल्याउँदा उनका निकटतम प्रतिद्वन्द्वी नेपाली कांग्रेसका बाबुराजा जोशीले १७ हजार ८१८ मत ल्याएका थिए । त्यतिबेला एमाले र माओवादी केन्द्रले चुनावी तालमेल गरेका थिए । चुनावी तालमेल हुँदाहुँदै पनि माओवादी केन्द्रका मिलन सुवालले १५ हजार ३७४ मत मात्र पाएका थिए । सुवाल अहिले माओेवादी छाडेर एमाले पुगेका छन् । त्यतिबेला यस क्षेत्रमा ७१ हजार ९१६ मत खसेको थियो।
२०४८ सालदेखि अहिलेसम्म भक्तपुर-१ मा नेमकिपा निरन्तर विजयी हुँदै आएको छ । यो क्षेत्रमा २०४८ सालदेखि २०७० सम्म नेमकिपाका अध्यक्ष नारायणमान बिजुक्छेंले निरन्तर जितेका थिए । उनले २०४८, २०५१, २०५६, २०६४ र २०७० गरी पाँच पटकसम्म भक्तपुर-१ बाट चुनाव जिते । छैटौंपटक २०७४ मा विजुक्छेंले पुस्तान्तरण भन्दै पार्टी सचिव प्रेम सुवाललाई उत्तराधिकारी बनाए । गत निर्वाचनबाट विजयी सुवाल अहिले पनि सोही क्षेत्रमा फराकिलो मतान्तरमा विजयी हुने योजनामा छन् ।
यो क्षेत्रमा जनता समाजवादी पार्टीबाट हीरालाल खडका तथा राप्रपाबाट भरत खड्काले उम्मेदवारी दिएका छन् । अर्जुन कोजु, पुष्पराम गेलाल, सुलोचना छ्वाजु र गोकर्ण नेपालले स्वतन्त्र उम्मेदवारी दिएका छन् ।
भक्तपुर-१ मा नेमिकपा हावी हुने विश्लेषण भएपनि अहिले जारी चुनावी सभामा एमाले उम्मेदवार गेलाल र सत्ता गठबन्धनका उम्मेदवार गोठे भने यस पटक नतिजा उल्टने आशयसहितको मन्तव्य राख्दै हिँडेका छन् । नेमकिपाका सुवाल भने विजयी हुनेमा ढुक्क छन् ।
यो निर्वाचन क्षेत्रको प्रदेशसभा अन्तर्गत क्षेत्रमा (क) मा एमालेबाट मोहनवीर श्रेष्ठ, नेपाली कांग्रेसबाट सुरेश श्रेष्ठ, राप्रपाबाट राजु कुइँकेल तथा नेमकिपाबाट मिनबहादुर बाटा उम्मेदवार छन् । त्यसैगरी भक्तपुर (ख)मा एमालेबाट नारायणसुन्दर मिन्ताकल, नेपाली कांग्रेसबाट पवन भुजु, राप्रपाबाट रोशन नापित तथा नेमकिपाबाट सुरेन्द्रराज गोसाइँले उम्मेदवारी दिएका छन् ।