५७ औं जन्मदिन मनाउँदै विश्वका तेस्रो धनी फिल्म स्टार शाहरुख खान

नयाँ दिल्ली : शाहरुख खान आज ५७ औं जन्मदिन मनाइरहेका छन्। शाहरुखलाई विश्वको तेस्रो धनी फिल्म स्टार मानिन्छ । उनको कुल सम्पत्ति ५१०० करोडभन्दा बढी छ। 

हिजो राति शाहरुखको घरबाहिर उनका फ्यानहरुको मेला लागेको थियो । शाहरुख खानलाई एकफेर हेर्न मात्र उनका फ्यानहरु राति अबेरसम्म पर्खिरहेका थिए। उनको घरबाहिर फ्यानहरूले चर्को स्वरमा शाहरुखको नाम पुकारिरहेका थिए । यसैबीच आतिशबाजीको मनोरम दृश्य पनि देखियो ।  

शाहरुख खानको जन्मदिनमा उनका केही फ्यानहरू अभावमा परेकाहरूलाई खाना बाढ्ने गर्छन्। 

शाहरुखकी आमा लतिफ फातिमा मजिस्ट्रेट थिइन् भन्ने कुरा धेरैलाई थाहा छैन । उनी आफ्नो समयको सफल मुस्लिम महिला मध्ये एक थिइन्। उनी सामाजिक कार्यमा धेरै अगाडि थिइन्। उनको पूर्व प्रधानमन्त्री इन्दिरा गान्धीसँग घनिष्ठ सम्बन्ध थियो। 

उनका बुबा मीर ताज भने साधारण व्यक्ति थिए। उनी पेशावरबाट आएर दिल्लीमा चिया बेच्ने गर्थे । दुर्घटनाले दुवैलाई एकसाथ ल्यायो र उनीहरुको विवाह भयो। शाहरुख खान नामको स्टार बन्ने कहानीको सुरु त्यहाँबाटै भयो ।

बुबा मीर ताज धेरै भाषाका ज्ञाता 

शाहरुख खानलाई इन्डस्ट्रीका किंग अफ रोमान्स भनिन्छ । तर, उनले यो गुण आफ्ना पिता मीर ताज मोहम्मदबाट पाएका थिए । मीर ताज, ६'२ उचाइ, पेशावरका पठान थिए। उनी स्वतन्त्रता संग्रामका युवा स्वतन्त्रता सेनानीहरूमध्ये एक थिए। मीर ताजको हास्य भावना उत्कृष्ट थियो। उनले एमए र एलएलबी अध्ययन गरेका थिए। उनलाई फारसी, संस्कृत, पश्तो, पञ्जाबी, हिन्दी, अंग्रेजीलगायत धेरै भाषाहरूको ज्ञान थियो। वकालतमा असफल भएपछि फर्निचर व्यवसाय, यातायात, मट्टितेल कारोवारको व्यवसाय गरे। भारत र पाकिस्तानको विभाजन पछि, मीर ताज परिवारसँगै दिल्लीमा बसोबास गरे। त्यहाँ उनको विलिंगेन अस्पतालको पछाडि एउटा चिया पसल थियो।

शाहरुखका अभिभावकको प्रेमकथा फिल्म जस्तै

एक दिन मीर ताज आफ्ना साथीहरूसँग दिल्लीको इन्डिया गेटमा घुम्न गए। उनले त्यहाँ कार दुर्घटना भएको देखे। कार उल्टो पल्टिएको थियो, जसमा लतिफ फातिमा, उनका दिदीबहिनी र बुबा थिए। 

चालक गाडी छोडेर फरार भएका थिए भने सबै घाइते अवस्थामा थिए । मीर ताजले आफ्नो साथीको सहयोगमा त्यो गाडीलाई सीधा गरे । रगतको जरुरत परेको बेला रगत समूह मिल्दा मीर ताज आफैले रगत दिए । उनको सो परिवारसँग मित्रता भयो र घर आउजाउ गर्न थाले।

एक दिन मीर ताज लतिफ फातिमाको घर पुगे । उनका बुवाले सोधे- हाम्रो कान्छी छोरीलाई बिहे गर्ने ? मीर ताजले भने- होइन, म जेठी बहिनीसँग बिहे गर्छु, जसलाई मैले रगत दिएको छु। लतिफ फातिमाको त्यतिबेला क्रिकेटर अब्बास अली बेगसँग इन्गेजमेन्ट भइसकेको थियो। तर उक्त इङ्गेजमेन्ट तोडेर फातिमाले मीर ताजसँग विवाह गरिन् । 

मीर ताजले सन् १९५९ मा ११ वर्ष कान्छी लतिफ फातिमासँग विवाह गरेका थिए । एक वर्षपछि उनीहरुको घरमा छोरीको जन्म भयो र त्यसपछि सन् १९६५ मा शाहरुख खान जन्मिए।

शाहरुख खानकी आमा लतिफ फातिमा हैदराबादकी थिइन्। उनी आफ्नो समयभन्दा अगाडि बढ्ने महिला थिइन् । उनले इङ्गल्याण्डको अक्सफोर्ड विश्वविद्यालयमा अध्ययन गरेकी थिइन्। उनी आफ्नो समयकी प्रथम श्रेणी मजिस्ट्रेट थिइन्। उनी समाजसेवामा पनि अगाडि थिइन् ।  

शाहरुख बाल्यकालमा जेल परेका थिए

शाहरुख खानको परिवार दिल्लीको राजेन्द्र नगरमा भाडाको घरमा बस्थे । आमाबुवाले केरोसिन एजेन्सी चलाउथे। एकपटक शाहरुख पनि अवैध मट्टीतेल कारोबारको आरोपमा पक्राउ परेका थिए । तर, उनले तत्काल जमानत पाए ।

खेलकुद बन्ने सपना  

सेन्ट कोलम्बस स्कुलमा पढ्दै गर्दा शाहरुखको खेलकुदमा रुचि जाग्यो । शाहरुख हक्की र फुटबलका माहिर थिए । एक दिन खेल्ने क्रममा शाहरुखको काँधमा गहिरो चोट लागेको थियो । शाहरुखको सपना खेलकुदमा करियर बनाउने थियो । तर, चिकित्सकले उनलाई खेलकुदबाट टाढा रहन सल्लाह दिए।