बैतडीमा गठबन्धनलाई बागीको चुनौती :  होला त दामोदरको ह्याट्रिक ?

धनगढी/बैतडी: बैतडीमा सत्तागठबन्धनलाई बागी उम्मेदवारहरुले चुनौती दिएका छन् ।

एक निर्वाचन क्षेत्र रहेको बैतडीमा प्रतिनिधिसभामा सत्ता गठबन्धनबाट नेकपा माओवादी केन्द्रका नरेन्द्रबहादुर कुवर (विजयसुन्दर) चुनावी मैदानमा छन् । त्यहाँ नेकपा एमालेले तेस्रो पटक दामोदर भण्डारीलाई मैदानमा उतारेको छ ।

कांग्रेसको बलियो आधार भएको बैतडीमा माओवादी केन्द्रलाई सीट दिएको भन्दै रुष्ट भएका कांग्रेसीहरुले बागी उम्मेदवार उठाएपछि गठबन्धनका उम्मेदवारलाई चुनौती थपिएको हो । कांग्रेस नेता, पूर्वराज्यमन्त्री तथा पाटन नगरपालिकाका निवर्तमान मेयर केशवबहादुर चन्दले प्रतिनिधिसभाका लागि बागी उमेदवारी दिएपछि गठबन्धनका कुवरलाई जीत निकाल्न चुनौती छ  । 

कुवर भूमिगत कालदेखि नेकपा माओवादी केन्द्रका चर्चित नेता हुन् । पुर्चौंडी नगरपालिका घर भएका उनले संविधान सभाको पहिलो निर्वाचन २०६४ मा बैतडी १ बाट एमालेका दामोदर भण्डारीलाई पराजित गर्दै जित निकालेका थिए । तर, त्यसपछिको चुनावमा भने उनको त्यो विरासत कायम रहन सकेन ।

२०७० सालको निर्वाचनमा कुवर बैतडी १ बाट दामोदर भण्डारीसँग पराजीत भए। त्यतिबेला पनि बैतडीमा प्रतिनिधिसभाका २ निर्वाचन क्षेत्र थिए । तर, २०७४ सालमा भने एमाले र नेकपा माओवादी केन्द्रको तालमेल भएकाले कुवर, भण्डारीका सारथी भएर काम गरे । २०७४ सालको निर्वाचनमा भण्डारीले कांग्रेसका नरबहादुर चन्दलाई ११ हजार २३३ मतान्तरले पराजित गरे । भण्डारीले ३९ हजार ५२४ मत ल्याउदा चन्दले २८ हजार २९१ मत मात्रै पाएका थिए ।

भण्डारीले पार्टीको नीति र नेतृत्व नै आफ्नो जित्ने आधार भएको दाबी गरेका छन् । ‘पार्टीको नीति र नेतृत्व नै मेरो जित्ने आधार हो । ‘सुखी नेपाली, समृद्ध नेपाल’को नारा एमालेले मात्रै साकार गर्न सक्छ भन्ने कुरा जनतालाई थाहा छ, त्यही जित्ने आधार हो,' भण्डारीले भने । 

तर, यसपाली उनै २०७४ सालका सहकर्मीहरुबीच प्रतिस्पर्धा भएको छ । नेकपा विभाजन भएर एमाले र माओवादी केन्द्र अलग/अलग भएपछि फेरि दुवैजना प्रतिस्पर्धा गर्ने स्थानमा पुगेका हुन् । ‘यसपाली मेरो ह्याट्रिक हुन्छ । गठबन्धनमा बागी उठनु भनेको जीत अझ सहज हुनु हो,' भण्डारीले भने ।

भण्डारीले पार्टीको नीति र नेतृत्व नै आफ्नो जित्ने आधार भएको दाबी गरे । ‘पार्टीको नीति र नेतृत्व नै मेरो जित्ने आधार हो । ‘सुखी नेपाली, समृद्ध नेपाल’को नारा एमालेले मात्रै साकार गर्न सक्छ भन्ने कुरा जनतालाई थाहा छ, त्यही जित्ने आधार हो,' भण्डारीले भने । 

उनले पछिल्ला १० वर्षमा गरेका विकास निर्माणका काम पनि आफ्नो जित्ने आधार भएको दाबी गरे । ‘पाटन विमानस्थलको कालोपत्रे, पाटन पञ्चेश्वर सडक निर्माण, महाकाली करिडोरमा अरबौंको बजेट, सतबाँझ–गोकुलेश्वर सडक र जनता आवास कार्यक्रम जस्ता विकास निर्माणका काम गरेको छु,' भण्डारीले भने । २०७० सालमा जितेपछि भण्डारी केही महिनाका लागि मात्रै अर्थ राज्यमन्त्री पनि भएका थिए । 

बैतडीमा कुल एक लाख ४० हजार २०१ मतदाता छन् । स्थानीय तहको निर्वाचनमा प्रमुखहरुले पाएको मतलाई आधार मान्ने हो भने त्यहाँ नेकपा एमाले ठूलो दल हो । एमालेबाट जितेका स्थानीय तहका प्रमुखहरुले कुल ३६ हजार ४६९ मत पाएका थिए भने कांग्रेसका स्थानीय तहका प्रमुखहरुले ३५ हजार ७४५ मत पाएका थिए । 

तर, गठबन्धनमा रहेका नेकपा माओवादी केन्द्रले ७ हजार ३३५ र नेकपा एकीकृत समाजवादीले ७ हजार ६८८ मत पाएको थियो । गठबन्धनका सबै मत जोडदा ५० हजार ७६८ मत हुन्छ । जुन नेकपा एमालेको भन्दा झण्डै १४ हजारले बढी छ । मतका आधारमा नेकपा एमालेको हाराहारीमा रहेको नेपाली कांग्रेस बैतडीले यसपाली त्यहाँ कांग्रेसकै उमेदवार माग गरेको थियो । तर गठबन्धनमा बैतडी नेकपा माओवादी केन्द्रको भागमा पर्‍यो । 

 कांग्रेसका धेरै नेता कार्यकर्ताहरु बागीहरुको पक्षमा खुलेर लाग्न थालेका छन् । पाटन नगरपालिकाका नगर सभापति मानबहादुर ऐर स्वयम स्वतन्त्र उम्मेदवारको पक्षमा खुलेर लागेका छन् । यद्यपी उनलाई जिल्ला समितिले स्पष्टिकरण पनि सोधिसकेको छ । 

स्थानीय तहमा पाएको मत अनुसार नेकपा माओवादी केन्द्रको ७ हजार ३३५ मत छ । कांग्रेसका ३५ हजार र समाजवादीका साढे ७ हजार मत मध्ये माओवादीलाई कति मत आउँछन् ? त्यो त परिणामले देखाउँला तर कांग्रेसले टीकट नपाएको असन्तुष्टिको फाइदा भने नेकपा एमालेलाई हुनसक्ने विश्लेषकहरु बताउँछन् ।

कांग्रेसबाट बागी उठेका केशवबहादुर चन्द पनि त्यहाँका लोकप्रिय नेता हुन् । पाटन नगरपालिकामा उनले गरेको कार्यमा खासै विवाद आएन । ‘मैले ३२ वर्ष कांग्रेसमा रहेर राजनीति गरे । कांग्रेसका ३५ हजार कार्यकर्ता छन् बैतडीमा । पार्टी केन्द्रले गरेको अपवित्र गठबन्धनको विरुद्धमा मेरो उमेदवारी हो । जिल्लाको सभापतिलाई समेत पार्टीले टिकट दिएन । यसरी सिद्धान्त विक्री गर्न पाइदैन भनेर म उठेको हो,' चन्दले भने ।

उनले कांग्रेसभित्रका असन्तुष्ट र एमालेसहितका अरु असन्तुष्ट नेताका मत नै आफ्नो जित्ने आधार बताए । ‘कांग्रेसमा यो गठबन्धनको विरोधमा धेरै नेता कार्यकर्ता छन्, त्यो मेरो पहिलो आधार हो । अझ अरु पार्टीका पनि असन्तुष्ट नेता कार्यकर्ताका लागि उपयुक्त उमेदवार हो, त्यसैले म जित्छु,' चन्दले भने ।

अझ कांग्रेसका धेरै नेता कार्यकर्ताहरु बागीहरुको पक्षमा खुलेर लाग्न थालेका छन् । पाटन नगरपालिकाका नगर सभापति मानबहादुर ऐर स्वयम स्वतन्त्र उम्मेदवारको पक्षमा खुलेर लागेका छन् । यद्यपी उनलाई जिल्ला समितिले स्पष्टिकरण पनि सोधिसकेको छ । 

कांग्रेसका धेरै नेताहरु बागीको पक्षमा लागेपछि गठबन्धनका उम्मेदवारलाई भने सकस भएको छ । ‘गठबन्धनसँग ५० हजार मत छन, अझ मेरो आफ्नै गृह पालिका पुर्चौंडीमा म अगाडि आउँछु, 'गठबन्धनका उम्मेदवार कुवरले भने, ‘स्थानीय तहको चुनावमा त्यहाँ कांग्रेस जिते पनि, प्रतिनिधिसभामा मेरो पक्षमा  जनमत छ ।’ 

बैतडीमा प्रदेश सभामा पनि गठबन्धनका विरुद्ध कांग्रेसका बागी उमेदवार उठेका छन् । प्रदेश क्षेत्र नं (१) बाट महाधिवेशन प्रतिनिधि हरिमोहन भण्डारीले गठबन्धनलाई चुनौती थपेका छन् ।

गठबन्धनका उम्मेदवार नरेन्द्रबहादुर कुवरको गृहपालिका पुर्चौंडी स्थानीय तहमा नेपाली कांग्रेसले जितेको छ । कांग्रेसका दिपकबहादुर बमले ५८ सय ८० मत ल्याउँदा नेकपा माओवादी केन्द्रका विक्रम कुवरले ३९ सय ६ मत ल्याएका थिए । स्थानीय तहको परिणामअनुसार कुवरको पालिकामा नेकपा एमाले दोस्रो स्थानमा छ । नेकपा एमालेका कर्णबहादुर कुवरले ३९ सय ६५ मत ल्याएका थिए । 

बैतडीमा प्रदेश सभामा पनि गठबन्धनका विरुद्ध कांग्रेसका बागी उमेदवार उठेका छन् । प्रदेश क्षेत्र नं (१) बाट महाधिवेशन प्रतिनिधि हरिमोहन भण्डारीले गठबन्धनलाई चुनौती थपेका छन् । सोही क्षेत्रमा नेकपा एकीकृत समाजवादीका नरेन्द्र बिष्टले पनि पार्टीबाटै उम्मेदवारी दिएका थिए । उनले पनि पार्टीकै चुनाव चिन्ह कलम लिएर चुनावी मैदानमा होमिएका छन् । 

बैतडीमा गठबन्धनबाट, प्रतिनिधि सभा नेकपा माओवादी केन्द्र र प्रदेशका दुबै सीट नेपाली कांग्रेसको भागमा परेको थियो । कांग्रेसले प्रदेशसभा निर्वाचन क्षेत्र (१) बाट वीरबहादुर विष्ट र प्रदेशसभा निर्वाचन क्षेत्र (२) बाट शिवराज भट्टलाई उठाएको छ । प्रदेश सभा (१) मा कांग्रेसका बागी र समाजवादीका विष्टले गठबन्धनका उमेदवार वीरबहादुर विष्टलाई असर पार्ने देखिन्छ । 

नेकपा एमालेले प्रदेश सभा (१) बाट सुरेन्द्र पाल र प्रदेश सभा (२) बाट लिलाधर भट्टलाई उम्मेदवार बनाएको छ। भट्ट यसअघि २०७४ सालको निर्वाचनमा प्रदेशसभा सदस्य पदमा सो क्षेत्रबाट जितिसकेका नेता हुन् । प्रदेश (१) मा देखिएका २/२ जना बागी उमेदवारका कारण त्यहाँ पनि एमालेका पाललाई सहज हुने विश्लेषण गरिन थालिएको छ ।