अमेरिकाले उडाउँदै बमवर्षक विमान
सोल (एजेन्सी) : शृंखलाबद्ध रूपमा क्षेप्यास्त्र परीक्षण गरेर कोरियाली प्रायद्वीपमा तनाव सिर्जना गरेको उत्तरकोरियालाई तर्साउन अमेरिकाले सुपरसोनिक बमवर्षक विमान उडाउने भएको छ। विमान दक्षिणकोरियाको आकाशमा उडाउने अमेरिकाको तायरी रहेको अन्तर्राष्ट्रिय सञ्चारमाध्यमले जनाएका छन्।
दक्षिणकोरियासँगको संयुक्त हवाई अभ्यासको अन्तिम दिन शनिबार प्योङयाङलाई आफ्नो शक्ति देखाउन अमेरिकाले सुपरसोनिक बमवर्षक विमान पनि अभ्यासमा समावेश गरिएको सोलले बताएको छ। वायुसेनाको संयुक्त अभ्यासमा बमवर्षक विमान पनि समावेश हुने बताएको दक्षिणकोरियाली रक्षा मन्त्रालयले थप विवरण सार्वजनिक गरेको छैन।
वायु सेनाको संयुक्त अभ्यासमा दुवै देशका अत्याधुनिक एफ थर्टीफाइभ लडाकु विमानसहित २ सय ४० विमान समावेश छन्। उक्त अभ्यासबाट आाक्रोशित प्योङयाङले यो साता समुद्रमा दर्जनौं क्षेप्यास्त्र प्रक्षेपण गर्नाका साथै अन्तरमहादेशीय क्षेप्यास्त्र परीक्षण गरेको थियो। उसले आन्तरिक रूपमा युद्धविमानसमेत उडाएर युद्धका निम्ति तम्तयार रहेको सन्देश प्रवाह गरेको थियो।
‘भिजिल्यान्ट स्टोर्म’ नामको अमेरिकासँगको कोरियाको संयुक्त सैन्य अभ्यासलाई सैन्य टकरावको उन्माद भन्दै उत्तरकोरियाली विदेश मन्त्रालयले शुक्रबार अबेर एक वक्तव्य निकालेर आफ्नो सार्वभौमसत्ता तथा राष्ट्रिय सुरक्षाविरुद्ध लाग्नेहरूलाई कडा जवाफ दिइने जनाएको छ।