अछाम : मंगलबार अछामको गाज्रामा लागेको प्रसिद्ध डौठेगडा जात्रामा उम्मेदवारहरु भोट माग्न व्यस्त देखिन्थे ।
जात्रामा उम्मेदवारहरु नेता कार्यकतासहित भोट माग्न पुगेका थिए । अछामका विभिन्न शक्तिपीठ तथा मन्दिरमा जात्राको रौनक जारी छ ।
यसका साथै चुनावको माहोलले झनै चहलपहल बढाएको छ । अहिले उम्मेदवारहरु भोटमाग्न विभिन्न ठाउँमा आयोजना हुने जात्रामा पुग्न थालेका छन् । जात्रामा अधिकांश मतदाता पुग्ने भएकाले पनि उम्मेदवारहरुलाई भोट माग्न सहज भएको गठबन्धनका अछाम १ प्रतिनिधिसभा सदस्य उम्मेदवार शेरबहादुर कुँवरले बताए ।
उनले भने,' यहाँको जात्रा जमघट हुने,सुख दु:ख साटासाट गर्ने माध्यम हो । जात्राहरु सांस्कृतिक धरोहर हुन् । मनोकांक्षा पूरा हुने बर्दादेवी माताको दैवी शक्ति छ। त्यसैले पनि हामी भोटको लागि जात्रामा पुगेका छौं ।जात्रामा सबै खुशी मनस्थितिमा भेटिन्छन्,आफ्ना एजेण्डा राख्न सहज पनि हुन्छ हामीलाई ।'
मसिर ४ गते हुने प्रदेशसभा तथा प्रतिनिधिसभाका सदस्यका उम्मेदवारहरू भोट माग्न जात्रामै पुग्न थालेका हुन् । जात्रामा एकैपटक धेरै व्यक्तिसँग भेट हुने भएकाले उम्मेदवारले भोट माग्ने उपाय अपनाएका हुन् । जात्रामा एकैपटक धेरै मतदाता भेटिने भएकाले उनीहरूसँग भेट गरी भोट दिन आग्रह गरेको गठबन्धनका प्रदेश सभा सदस्यका उम्मेदवार मेघराज खड्काले बताए ।
उनले भने,‘सबैका घर–घरमा पुगको छु तर पनि नभेटिएका मतदाता जात्रामा भेटिन्छन्, जात्राले सबैसँग भेटघाट गर्ने अवसर जुराउँछ । आफ्नो उम्मेदारीका बारेमा जात्रामै भेटिएका मतदातासँग कुरा राख्छु ।’
अहिले एमाले र गठबन्धनका उम्मेदवार आ-आफ्ना पक्षमा मत तान्ने प्रयासमा छन् । जिल्लाको प्रसिद्ध डौठेगडाको जात्रामा सहभागी भयौं,देउडा खेल्यौं,यसले झन् आपसी भाइचाराको सम्बन्ध मजबुत बनाउँछ ।’जात्राको रौनकसँगै उम्मेदवारहरूका कुरा सुन्न पाउँदा रमाइलो लागेको डौठेगडा जात्रामा भेटिएका हरिस साउदले बताए ।
उनले भने,‘यसपटकको जात्रा निर्वाचनका कारणले फरक भयो, पूजापाठका साथै राजनीतिक कुराकानी पनि भयो । उम्मेदवारहरूसँग आफ्ना कुरा पनि राख्यौं ।’
खरबारीमै पनि उम्मेदवार
एकातिर जात्राको रौनक छ भने अर्कोतिर कामको चटारो छ । यहाँका स्थानीयहरु अहिले गहुँ छर्नमा व्यस्त छन् । अधिकांश स्थानीयहरु अहिले खेतबारीमै भेटिन्छन् । भोट माग्न उम्मेदवार खरबारीमै पुग्ने गरेका छन् । खेतबारीमै गएर भोट माग्ने गरेको एमालेका अछाम १ प्रतिनिधि सभा सदस्यका उम्मेदवार झपटबहादुर बोहराले बताए ।
अहिले खेतबारीमा मतदाता रिझाउन उम्मेदवारहरु हलो समेत जोत्न थालेका छन् । उनले भने, ‘जनताले काम गरेकै ठाउँमा जाँदा उनीहरूका समस्या बुझ्न झन् सजिलो हुन्छ । त्यसैले काम गरिरहेकै ठाउँबाट भोट माग्ने काम गरिरहेका छौं ।’
गाउँघरमा कामको चटारो रहेकाले काम गरिरहेकै ठाउँमा गएर भोट मागिरहेको उनले बताए । भोट माग्ने बेला मात्र नेताहरुले अनेक उपाय अपनाउने जितिसकेपछि खासै वास्ता नगर्ने गरेको स्थानीय कौशिला साउदले बताइन् । उनले भनिन्, ‘निर्वाचनको बेलाजस्तै अरू बेला पनि नेताहरू गाउँ पसे विकास हुन बेर लाग्ने थिएन।'
बान्नीगढी जयगढ गाउँपालिका १ गाज्रामा लागेको डौठेगडा जात्रामा भोट माग्दै प्रदेशसभा सदस्यका उम्मेदवार मेघराज खड्का। तस्बिर :अन्नपूर्ण
प्रतिक्रिया दिनुहोस !
