सुर्खेत : सुर्खेतमा मतदान केन्द्रलाई अपाङ्गगतामैत्री बनाइने भएको छ ।
यसका लागि आवश्यक प्रक्रिया अगाडि बढेको प्रदेश निर्वाचन कार्यालय सुर्खेतले जनाएको छ । आगामी मङ्सिर ४ गते हुने प्रदेशसभा तथा प्रतिनिधिसभा सदस्यको निर्वाचनमा सुर्खेतका १० वटा मतदान केन्द्रलाई अपाङ्गतामैत्री बनाइने भएको हो ।
यसअघिका निर्वाचनमा अपाङ्गगता भएका व्यक्तिहरुले मतदानको समयमा सास्ती भोग्दै आएका थिए । मतदान केन्द्रहरु अपाङ्गगतामैत्री नहुँदा मतदान केन्द्रसम्म पुग्न, मतदान स्थलमा भीड छिचोल्न र मतदान गर्न अपाङ्गगता भएका व्यक्तिले हैरानी व्यहोर्दै आएका थिए । यही समस्या समाधान गर्न यसपाली मतदान केन्द्रलाई अपाङ्गगतामैत्री बनाउन लागिएको हो । विशेषगरी वीरेन्द्रनगर उपत्यका भित्रका १० वटा मतदान केन्द्र अपाङ्गगतामैत्री हुनेछन् ।
प्रदेश निर्वाचन कार्यालयका अनुसार वीरेन्द्रनगर भित्रका १० वटा केन्द्रलाई अपांग महासंघको समन्वयमा अपाङ्गगतामैत्री बनाउन लागिएको छ । प्रदेश निर्वाचन अधिकारी दुर्गाप्रसाद चालिसेले सहजताका लागि वीरेन्द्रनगर भित्रका मतदान केन्द्रलाई अपाङ्गगतामैत्री बनाउन लागिएको जानकारी दिए ।
ती केन्द्रमा दृष्टिविहीन, शारीरिकरुपमा अपाङ्गगता भएका मतदाताहरुले मात्र मतदान गर्न पाउनेछन् । वीरेन्द्रनगर भित्रका जन नमूना मावि, श्रीकृष्ण संस्कृत मावि, अमरज्योति मावि, भैरव मावि, सिद्ध बहिरा स्कुलगायतका केन्द्रलाई अपाङ्गगतामैत्री बनाइने जानकारी उनले दिए । यसले अपाङ्गगता भएका व्यक्तिलाई लामो समयसम्म लाइन लाग्नु नपर्ने र भीडभाडमा हुने झन्झट हट्ने अपेक्षा गरिएको छ ।
यस्तै, सुर्खेत कारागारमा रहेका कैदीबन्दीले पहिलो पटक मतदान गर्न पाउने भएका छन् । सुर्खेत कारागारमा रहेका एकसय एकजना कैदीबन्दीले प्रतिनिधिसभाको समानुपातितर्फ मात्र मतदान गर्न पाउनेछन् । प्रतिनिधिसभाको प्रत्यक्ष तथा प्रदेशसभाका लागि मतदान गर्न पाउने छैनन् । प्रदेश निर्वाचन अधिकारी चालिसेले कारागारभित्रै सवैले देख्न पाउनेगरी मतदान गर्ने व्यवस्था मिलाएको बताए ।
यसैबीच निर्वाचनमा सुर्खेतमा कार्यरत तीन हजार दुई सय २८ जना कर्मचारीले पनि मतदान गर्न पाउनेछन् । उनीहरुले आफू जहाँ निर्वाचनमा खटिएका छन् त्यहीँबाट मतदान गर्न पाउनेछन् । उनीहरुले पनि प्रतिनिधिसभातर्फको समानुपातिकमा मात्र मतदान गर्न पाउने प्रदेश निर्वाचन अधिकारी चालिसेले जनाए ।
सुर्खेतमा निर्वाचन सम्पन्न गराउन तीन हजार पाँचसय ९ कर्मचारी खटिने छन् । मतदान अधिकृत दुईसय ९५ जना, सहायक मतदान अधिकृत दुई सय ९५ जना, सहायक कर्मचारी एक हजार चार सय ६४ जना, कार्यालय सहयोगी दुई सय ९५ जना र स्वयंसेवक एक हजार एक सय ६० जना खटिने प्रदेश निर्वाचन कार्यालयले जनाएको छ ।
त्यसैगरी प्रदेश निर्वाचन कार्यालयले कर्णाली प्रदेशका १० वटै जिल्लामा मतपत्र तथा निर्वाचन सामग्रीहरु पुगि सकेको जनाएको छ । हुम्ला, डोल्पा, मुगु, जुम्ला र सुदूरपश्चिमको बाजुरामा हेलिकोप्टरबाट मतपत्र ढुवानी गरिएको छभने हुम्ला, डोल्पा र मुगुमा निर्वाचन सामग्री पनि हेलिकप्टरबाटै ढुवानी गरिएको छ । अन्य जिल्लामा भनेर गाडीबाट सामग्रीहरु पु र्याइएको छ ।
प्रतिक्रिया दिनुहोस !
