मतदाताको घरदैलोमा प्रदिप ज्ञवाली : यति धेरै माया र विश्वास पाएको छु, कहिल्यै टुट्न दिनेछैन

गुल्मी : गुल्मी क्षेत्र नम्बर १ का प्रतिनिधीसभा सदस्य एवम् नेकपा एमालेका उपमहासचिव प्रदिप ज्ञवालीले मतदाताको घरदैलोमा पुग्दा अटुट माया र विश्वास पाएकाले त्यसलाई कदापी टुट्न नदिने प्रतिवद्धता जनाएका छन् । 

रेसुंगा नगरपालिका वडा नम्बर ९ मा आयोजित चुनावी भेटघाटको क्रममा ज्ञवालीले गुल्मीको मुहार फेर्नका लागि आफू सदैव क्रियाशील भएर लागिरहेको बताए। 
‘मतदाताको यति धेरै मायाँ र विश्वास पाएका छौँ’,उनले भने,‘यो विश्वास र मायालाई भुल्नु भनेको जनताप्रतिको धोका हो ।’ उनले विपक्षी दलका उम्मेदवारहरुलाई स्वच्छ प्रतिस्पर्धा गर्न र अरुको पहलमा भएको विकासलाई आफूले गरेको भनेर भ्रम नफिज्याउन पनि सुझाए । 

ज्ञवालीले एमाले देशको राष्ट्रियताको पहरेदार भएकाले यसपालि पनि पूनः एमाले देशकै पहिलो पार्टी हुने ठोकुवा समेत गरे । नाकाबन्दी, चुच्चे नक्सा र राष्ट्र कमजोर भएको बेला देशको पक्षमा दरिलो रुपमा उभिएकै कारण जनताको मनमनमा एमाले बसेको उनको भनाइ छ । गुल्मी क्षेत्र नम्बर १ मा एमालेबाट ज्ञवाली र गठबन्धनबाट कांग्रेसका नेता चन्द्र भण्डारी प्रतिस्पर्धामा छन् ।