निर्वाचनमा खटिएका कर्मचारी सामग्रीसहित मतदान केन्द्र प्रस्थान

जाजरकोट : जाजरकोटका भेरीबाहेक ६ स्थानीय तहका निर्वाचनमा खटिएका कर्मचारी सामग्री बुझेर मतदान स्थलतर्फ प्रस्थान गरेका छन् । मंसिर १ गते भित्र सबै मतदान स्थलमा निर्वाचनमा खटिने कर्मचारी र सुरक्षाकर्मी पुगि सक्नुपर्ने निर्वाचन आयोगको निर्देशन अनुरुप कर्मचारीहरु बुधबार प्रस्थान गरेका हुन् ।

 सदरमुकाम रहेको भेरी नगरपालिकामा खटिएका कर्मचारी भने बिहीबार मात्र जानेछन् । निर्वाचनका लागि आवश्यक पर्ने मतपत्र, मतपेटिका, स्वस्तिक छापलगायतका आवश्यक सामग्रीसहित कर्मचारीहरु सुरक्षाकर्मीसहित प्रस्थान गरेको मुख्य निर्वाचन अधिकृत केशव चपाईले बताए ।

 जिल्लाका बारेकोट, नलगाड, कुशे, छेडागाड र शिवालय गाउँपालिकामा खटिएका कर्मचारी बुधबार र जुनीचाँदे गाउँपालिकामा खटिएका कर्मचारी मंगलबार नै त्यसतर्फ प्रस्थान गरिसकेका छन् । 

यायातातको पहुँच नभएका मतदान स्थलमा पुग्न पैदल हिँड्नुपर्ने भएकाले अगाडि नै त्यसतर्फ पठाइएको मुख्य निर्वाचन अधिकृत चपाईले बताए । सात पालिका रहेको जाजरकोटमा एक सय ५३ मतदान केन्द्रमा एक हजार एक सय ४० कर्मचारी खटाइएको छ ।

जिल्लामा शान्ति सुरक्षा र निर्वाचन सुरक्षालाई मध्य नजर गरेर तिन घेरामा सुरक्षा व्यवस्था मिलाइएको प्रमुख जिल्ला अधिकारी श्रेष्ठले बताए । पहिलो घेरामा म्यादी प्रहरी र जनपद प्रहरी, दोस्रो घेरामा सशस्त्र प्रहरी र तेस्रो घेरामा नेपाली सेनालाई परिचालन गरिनेछ ।