बैतडीमा प्रहरी सवार जीप दुर्घटना : ४ प्रहरीको मृत्यु
मंसिर ५, २०७९ सोमबार ९:४४:०
बैतडी : बैतडीमा प्रहरी सवार जीप दुर्घटना हुँदा ४ जना प्रहरीको घटनास्थलमै मृत्यु भएको छ। सोमबार बिहान करिब ७ बजे बैतडीबाट पाटनतर्फ आउँदै गरेको १ ज ८५४ नं जीप पाटन नगरपालिका ४ थूम भन्ने स्थानमा दुर्घटना भएको हो।
दुर्घटनामा ४ जना प्रहरीको घटनास्थलमै मृत्यु भएको घटनास्थलमा खटिएका सत्बाज प्रहरी चौकीका इन्चार्ज ऐन बहादुर पालले जानकारी दिए। अन्य चालकसमित ८ जना घाइते भएका उनले बताए।
मृत ३ जनाको परिचय खुलेको छ। मृत्यु हुनेमा प्रहरी जवान लोकन्द्रबहादुर थापा मगर, प्रहरी जवान रमेश साउँद र सहायक हवल्दार अर्जुन कठायत रहेका छन्। एक जना प्रहरीको शव दुर्घटनाग्रस्त जीपमुनि रहेको र निकाल्ने प्रयास भइरहेको उनले बताए।
यसैगरी जीप दुर्घटनामा परी घाइते भएका ४ जनालाई नेपाली सेनाको हेलिकप्टर मार्फत नेपालगञ्ज लगिएको छ। बिहान ९ बजे पाटन प्राथमिक स्वास्थ्य केन्द्रमा उपचार हुन नसकेपछि हेलिकप्टर मार्फत नेपालगञ्ज लगिएको प्राथमिक स्वास्थ्य केन्द्र पाटनले जनाएको छ। घाइतेहरुको पनि परिचय नखुलेको प्रहरीले जनाएको छ।
जीप सडकबाट करिब २ सय मिटर तल खसेको छ। दुर्घटनाको कारण खुल्न सकेको छैन। दुर्घटनामा परेका प्रहरी तालिम केन्द्र दिपायलमा कार्यरत थिए। उनीहरुलाई निर्वाचनका लागि बैतडी खटाइएको थियो।
प्रतिक्रिया दिनुहोस !
