भक्तपुर: भक्तपुर निर्वाचन क्षेत्र नं २ मा एमालेका महेश बस्नेतले मतान्तर घटाएका छन् । मंगलबार साँझसम्मको परिणाम अनुसार बस्नेत १३७ मतले मात्रै पछाडि छन् । कांग्रेसका दुलर्भ थापाले १९ हजार २७० मत पाएका छन् । बस्नेतले १९ हजार १३३ मत पाएका छन् ।
अहिलेको परिणाम अनुसार तेस्रो रहेकी नेपाल मजदुर किसान पार्टीकी उम्मेदवार अनुराधा थापा मगरले पाँच हजार १११ मत पाएकी छन् । मतगणना जारी छ । यहाँ ६५ हजार ९३५ मत खसेको छ ।
यस क्षेत्रमा सुरुदेखि नै कांग्रेसका दुलर्भ थापाको अग्रता छन् ।
भक्तपुर क्षेत्र नं १ मा एमालेका नवराज गेलाल अगाडि छन् । उनलाई नेपाल मजदुर किसान पार्टीका प्रेम सुवालले पछ्याइरहेका छन् । भक्तपुर निर्वाचन क्षेत्रको चाँगुनारायण क्षेत्रको मतगणना सकिएको छ । अब भक्तपुर नगरपालिका क्षेत्रको मात्रै मतगणना बाँकी छ । यो नेमकिपाको गढ हो । यहाँको मतगणनाको सुरुवातसंगै सुवाल अगाडि आउने निश्चित छ।
एमालेका नवराज गेलालले ६ हजार ८१७ मत पाएका छन् भने नेमकिपाका प्रेम सुवालले ५ हजार २५९ मत पाएका छन् । भक्तपुर क्षेत्र नम्बर १ मा कुल ७४ हजार मत खसेको थियो । यो नतिजा ३४ हजार मतसम्मको हो ।
भक्तपुर १ क चाँगुनारायण प्रदेशमा भने कांग्रेसका सुरेश श्रेष्ठ अगाडि छन् । भक्तपुर क्षेत्र नं २ ख भक्तपुर नगरपालिकाको मतगणना भने थालिएको छैन । उता भक्तपुर क्षेत्र नं २ ख मध्यपुर थिमि क्षेत्रमा सता गठबन्धनकोतर्फबाट नेकपा एसका डा राजेन्द्रमान श्रेष्ठ अगाडि छन् । यहाँ दोस्रोमा एमालेका चन्दनकृष्ण श्रेष्ठ छन् भने तेस्रोमा नेमकिपाका रमेश वैद्य छन् ।
भक्तपुर क्षेत्र नं २ क सूर्यविनायकमा भने एमालेका किरण थापा अगाडि छन् । उनलाई कांग्रेसका विष्णुराज कार्कीले पछ्याइरहेका छन् ।
भक्तपुर क्षेत्र नं २ मा आइतबार राति दुई बजेदेखि गणना सुरु भएको थियो । भक्तपुर २ को मतगणना मध्यपुर थिमि बोडेको कृषि विकास तालिम केन्द्र बोडेमा भइरहेको छ । भक्तपुर क्षेत्र नं १ को मतगणना सोमबार बिहान नौ बजेदेखि नेपाल विद्युत प्राधिकरण खरिपाटी केन्द्रबाट सुरु भएको थियो ।
प्रतिक्रिया दिनुहोस !
