काठमाडौंः विसं २०३८ सालको राष्ट्रिय पञ्चायत सदस्यको निर्वाचनमा निर्वाचित तीन सांसद प्रतिनिधि सभा निर्वाचन २०७९ मा निर्वाचित भएका छन् ।
२०३८ सालको चुनावमा विजयी भएका कांग्रेसका अर्जुननरसिंह केसी, लोकतान्त्रिक समाजवादी पार्टीका शरतसिंह भण्डारी र राप्रपाका दीपक बोहोरा निर्वाचित भएका हुन् ।
केसी २०३८ सालको चुनावमा नुवाकोटबाट हलो चिन्ह लिएर चुनाव लडेका थिए । भण्डारी महोत्तरीबाट हाँस चुनाव चिन्हबाट जित्दा दीपक बोहोरा भने बलेको दियो चिन्हबाट चुनाव लडेका थिए । त्यसपछि उनीहरु पटक–पटक सांसद र मन्त्री बनेका छन्।
दीपक बोहराले रुपन्देही–३ बाट, अर्जुननरसिंह केसी नुवाकोट–२ बाट र शरतसिंह भण्डारी महोत्तरी–२ बाट निर्वाचित भएका हुन् । बोहोराले बहालवाला गृहमन्त्री बालकृष्ण खाणलाई पराजित गर्दै विजयी भएका हुन् ।
बोहोरा ४ दशकदेखि राप्रपामा क्रियाशील छन् । २०३८ सालमा राष्ट्रिय पञ्चायत सदस्यमा निर्वाचित उनी २०४२ सालको राष्ट्रिय पञ्चायत सदस्य निर्वाचित भएका थिए । उनी २०७० सालमा रुपन्देही निर्वाचन क्षेत्र नम्बर २ बाट संविधानसभा सदस्यमा निर्वाचित भएका थिए ।
बोहोरा २०४४ मा निर्माण तथा यातायातमन्त्री, २०४३ मा निर्माण तथा यातायात राज्यमन्त्री, २०४० मा पर्यटन राज्यमन्त्री, २०३८ सालमा पर्यटन राज्यमन्त्री र २०३८ मा पर्यटन सहायकमन्त्री, २०७३ सालमा आपूर्तिमन्त्री, २०७४ मा स्वास्थ्यमन्त्री, २०७२ मा श्रम तथा रोजगार मन्त्री, २०६७ मा वन तथा भूसंरक्षण मन्त्री बनेका थिए ।
यस्तै, कांग्रेस नेता केसी राष्ट्रिय स्वतन्त्र पार्टीका उम्मेदवार सुमन विक्रम पाण्डेलाई ११ हजार ६३० मतान्तरले पराजित गर्दै विजयी भएका हुन् । २०३८ सालमा केसी सूर्यबहादुर थापाको मन्त्रिपरिषद्मा स्वास्थ्य राज्यमन्त्री नियुक्त भए ।
०४८ र ०५१ को संसदीय चुनावमा केसी दुई पटक संसद सदस्यको रूपमा पनि निर्वाचित भएका थिए । केसी स्वास्थ्य, शिक्षा र भौतिक योजना मन्त्री थिए । २०७३ मा माओवादी अध्यक्ष प्रचण्ड नेतृत्वको सरकारमा केसी सहरी विकास मन्त्री थिए ।
लोसपा नेता शरतसिंह भण्डारी महोत्तरी–२ बाट तराई मधेश लोकतान्त्रीक पार्टीका विजयकुमार सिंहलाई १४ हजार ७० मतान्तरले पराजित गर्दै निर्वाचित भएका हुन् । भण्डारी २०४३ देखि हालसम्म विभिन्न मन्त्रिपरिषद्मा १५ पटक राज्यमन्त्री र मन्त्रीको जिम्मेवारी सम्हालिसकेका छन् ।
भण्डारी नेपाली कांग्रेसको तर्फबाट आम निर्वाचन २०५६ मा व्यवस्थापिका संसदमा निर्वाचित भएका थिए । नेपाली कांग्रेस विभाजित हुँदा भण्डारी नेपाली कांग्रेस (लोकतान्त्रिक)को पक्षमा गएका थिए ।
प्रतिक्रिया दिनुहोस !
