विराटनगर: रोजगारी सिर्जनाको उद्देश्यका साथ मोरङको कटहरी गाउँपालिकामा १ दिने ‘वृत्ति परामर्श तथा रोजगार मेला’ आयोजना हुने भएको छ ।
कटहरी–१ स्थित सिंघिया खोला छेउको एकीकृत फलफुल तथा कृषि थोक बजारको प्राङ्गणमा उक्त मेला आयोजना हुने भएको हो । विशेषगरी वैदेशिक रोजगारीबाट फर्किएका बेरोजगार युवा तथा श्रमिकहरुलाई लक्षित गर्दै मेलाको आयोजना गर्न लागिएको गाउँपालिकाले जनाएको छ ।
आईतबार पत्रकार सम्मेलन गर्दै गाउँपालिकाले मेलाबारे विस्तृत जानकारी सार्वजनिक गरेको छ ।
कटहरी गाउँपालिकामा कुल १ हजार ३४ जना सुचीकृत बेरोजगारहरु छन् । उनीहरुमध्ये दक्ष तथा योग्यलाई रोजगारदातासँग प्रत्यक्ष सम्पर्क गराउने र सीप नभएकालाई आवश्यक तालिम तथा परामर्श प्रदान गर्ने मेलाको उद्देश्य छ ।
मेलामा कटहरीभित्र भएका बेरोजगार यूवाहरुलाई वृत्ति विकास सम्बन्धी आवश्यक परामर्श, सिपमुलक तालिम दिने संस्थाहरुको प्रर्दशनी र कार्यस्थलमा आधारित सीपमुलक तालिमबारे जानकारी दिईने बताईएको छ । नेपाल सरकारको सुखी नेपाली समृद्ध नेपालको राष्ट्रिय परिकल्पना तथा ५ लाख युवालाई रोजगारी उपलब्ध गराउने उद्देश्यलाई पनि यस मेलाले सम्बोधन गरेको छ ।
स्थानीय जनशक्तिलाई स्थानीय उद्योग, व्यावसाय, बैकिङ्ग, पर्यटन र होटल व्यावसाय क्षेत्रमा खपत गर्ने लक्ष्य समेत यस मेलाले लिएको छ । विगतमा कटहरी गाउँपालिका यस प्रकृतिका विभिन्न रोजगार मेलाहरुमा सहकार्य गर्दै आएको थियो । तर, स्थानीयस्तरमा रोजगारी सिर्जनाको उद्देश्यका साथ गाउँपालिकाले यसपटक आफै मेला आयोजना गर्न लागेको गाउँपालिका अध्यक्ष देवराज चौधरीले जानकारी दिए ।
नेपाल उद्योग वाणिज्य महासंघ, प्रदेश १ र नेपाल सरकार तथा स्विजरल्याण्ड सरकारको द्विपक्षीय परियोजनाको रुपमा रहेको ‘दिगो तथा सम्मानित रोजगारीका लागि सिप’ को सहयोगमा उक्त मेला आयोजना गर्न लागिएको कटहरी गाउँपालिकाले जनाएको छ । गाउँपालिकाका अनुसार दिउँसो ४ बजेसम्म चल्ने उक्त रोजगार मेला भने बिहान ९ बजे उद्घाटनको तयारी रहेको बताईएको छ । मेलामा भने कुल २ हजार ५ सय बढीको सहभागिता रहने अपेक्षा गरिएको छ ।
प्रतिक्रिया दिनुहोस !
