सिमराः बारा निजगढ नगरपालिका ७ का सञ्जीव नेपाली तेक्वान्दो खेल क्षेत्रमा परिचित नाम हो ।
उनी तेक्वान्दो खेलको माध्यमबाट नेपाललाई अन्तर्राष्ट्रिय स्तरमा चिनाउन सफल खेलाडी पनि हुन् ।
अन्तर्राष्ट्रिय स्तरका प्रतियोगितामा सहभागी भएर देशका लागि थुप्रै पदक जितेका सञ्जीव नेपालको राष्ट्रिय झण्डा विदेशमा फहराउने मुख्य खेलाडीको सूचीमा पर्छन् । तेक्वान्दो खेलमा सञ्जीवले हासिल गरेको सफलता आज उनको पहिचान बनेर स्थापित भएको छ ।
सानो उमेरदेखि तेक्वान्दो खेलमा समर्पित सञ्जीव यतिबेला खेलाडीका प्रशिक्षक बनिसकेका छन् ।
तेक्वान्दो प्रति उनको लगावले उनलाई खेलाडीमा मात्र सीमित गरेन, दक्ष खेलाडी उत्पादन गर्ने प्रशिक्षकको भूमिकामा समेत अघि बढ्न प्रेरित गर्यो । जसकारण उनले आफ्नो बाँकी जीवन तेक्वान्दोमै समर्पित गर्ने निर्णय गरेर यसै क्षेत्रमा सक्रिय छन् ।
तेक्वान्दो खेलबाट सफलताको शिखर चुमेका सञ्जीवको बाल्यकाल सामान्य परिवारमा बितेको थियो । उनी कक्षा ६ मा पढ्दादेखि नै तेक्वान्दोमा आकर्षित भएका थिए । सन् १९९९ मा सञ्जीवले आफ्नो खेल जीवनको औपचारिक सुरुवात गरेका थिए ।
बुवा भवनाथ, आमा मञ्जुदेवी र काका गोकुलले तेक्वान्दो खेल खेल्न प्रेरित गरेपछि सञ्जीव यस खेलमा आकर्षित भएका हुन् ।
तेक्वान्दो प्रवेश गरेसंगै निजगढ डोजाङको सदस्य भएका सञ्जीव नियमित प्रशिक्षण लिन थाले । उनलाई कृष्णमुरारी खड्का र चित्रबहादुर लामाले प्रशिक्षण गराउँथे । खड्का र लामाबाट प्रशिक्षित सञ्जीवले तेक्वान्दो खेललाई नियमित बनाउन थाले ।
घरदेखि तेक्वान्दो खेल्ने स्थान नजिकै भएका कारण पनि सञ्जीवलाई सहज भयो । तेक्वान्दो खेल्ने क्रममा स्थानीय र क्षेत्रीय स्तरका विभिन्न प्रतियोगितामा सहभागिता जनाउदै उनले अनुभव बटुल्न थाले । उनको खेलबाट प्रशिक्षक समेत निकै प्रभावित हुन्थे । आकर्षक खेल प्रदर्शन गरेका कारण उनले सबैबाट हौसला पाउँथे ।
तेक्वान्दो र शिक्षालाई संगै अघि बढाएका सञ्जीव प्रविणता तहको अध्ययनपछि काठमाडौं पुगे । उच्च शिक्षा अध्ययन गर्न काठमाडौं पुगेका उनले त्यहीबाट तेक्वान्दो खेललाई नियमित गर्न थाले।
उनी जावलाखेल डोजाङमा आवद्ध भएर प्रशिक्षण लिने र जुनियर खेलाडीलाई प्रशिक्षण समेत सुरु गरे ।
निजगढबाट काठमाडौं पुगेका सञ्जीवले थुप्रै प्रतियोगितामा सहभागी भएर अनुभव बटुल्ने अवसर प्राप्त गरे । जसले उनको खेललाई थप तिखार्दै लग्यो र सफलतातर्फ अघि बढाउदै लग्यो ।
सञ्जीवले सन् २०१९ मा बेलायतको म्यानचेस्टरमा आयोजना भएको ‘ब्रिटिस अटम ओपन च्याम्पियनसिप’ मा नेपालका लागि स्वर्ण पदक जिते । त्यसअघि २०१८ मा हङकङ-नेपाल तेक्वान्दो महासंघले आयोजना गरेको १६औँ च्याम्पियनसिपमा रजत पदक र सन् २०१९ मा स्पेनको बार्सिलोनामा आयोजना भएको २०औँ अन्तर्राष्ट्रिय तेक्वान्दो च्याम्पियनसिपमा कास्य पदक जितेका थिए ।
उनले हङकङमा आयोजित २२औं एसियन सिटीज तेक्वान्दो च्याम्पियनसिपमा स्वर्ण पदका जितेका थिए । दक्षिण कोरियाको मुजुमा सन् २०१८ जुलाई २२ मा आयोजित मास्टर्स कोर्स उनले पूरा गरिसकेका छन् ।
तेक्वान्दोमा थुप्रै सफलता हात पारेका सञ्जीवले सन् २०१९ मा अमेरिकाको लस भेगासमा आयोजित यूएस ओपन, सन् २०१८ मा भएको क्यानडा ओपन र २०१८ मै भएको जी–रेंकको अन्तर्राष्ट्रिय प्रशिक्षक सेमिनारमा सहभागिता जनाएका छन् ।
सन् २०२१ मा सञ्जीव थप प्रशिक्षणका लागि मकाउ पुगे । त्यहाँ पुगेपछि उनले मकाउ तेक्वान्दो महासंघमा आवद्ध भएर आफू प्रशिक्षित हुने र अन्यलाई प्रशिक्षण दिन थाले । खेलाडीसंगै रेफ्रीको मान्यता समेत प्राप्त गर्दै अघि बढेका सञ्जीवले थुप्रै प्रतियोगितामा रेफ्रीको भूमिका समेत निर्वाह गरेका छन् ।
साउथ कोरियामा रहेको तेक्वान्दोको मुख्यालयबाट पाचौं तहको डान प्राप्त गरेका सञ्जीव तेस्रो तहको अन्तर्राष्ट्रिय प्रशिक्षक समेत हुन् । उनले विभिन्न देशमा आयोजना हुने प्रतियोगितामा निर्णायकको भूमिकामा रहेर समेत काम गर्दै आएका छन् । अहिले उनी अमेरिकाको विभिन्न शहरमा आयोजित तेक्वान्दोको प्रतियोगिता सहभागी भएर निर्णायको भूमिका निर्वाह गरिरहेका छन् ।
खेलकुदको माध्यमबाट देशविदेशमा चर्चा बटुलेका सञ्जीवमा समेत विभिन्न संघसंस्थाबाट सम्मानित भईसकेका छन् । राष्ट्रिय खेलकुद परिषद, गैरआवासीय नेपाली संस्था मकाउ, मधेस प्रदेश सरकार, जावलाखेल तेक्वान्दो डोजाङ, निजगढ नगरपालिका, तारकेश्वर नगरपालिकाले पनि उनलाई सम्मान गरेको छ ।
थुप्रै संघसंस्थाबाट सम्मानित भएका सञ्जीव आफ्नो जीवन तेक्वान्दोमै समर्पित गर्न चाहन्छन् ।
‘तेक्वान्दो खेलले पहिचान दिलाएको छ । अब मेरो लक्ष्य भनेको यस खेलमा दक्ष खेलाडी उत्पादन गर्ने हुनेछ’ सञ्जीवले भने ‘जति धेरै खेलाडी उत्पादन गर्न सके त्यति मलाई सन्तुष्टि मिल्नेछ ।’
प्रतिक्रिया दिनुहोस !
