जोमसोम: मंसिर ४ गते सम्पन्न प्रतिनिधि र प्रदेशसभा निर्वाचनमा बदर मतको सख्या न्यून रहेको जिल्ला निर्वाचन कार्यालय मुस्ताङले जनाएको छ ।
आयोगले लागु गरेको मतदाता शिक्षालाई प्रभावकारी रुपमा अघि बढाईएकाले मुस्ताङमा बदर मतको सख्या कम भएको जिल्ला निर्वाचन कार्यालयले जनाएको छ ।
मुस्ताङमा प्रतिनिधि सभा प्रत्यक्षतर्फ एक दशमलव २ प्रतिशत र प्रदेशसभा प्रत्यक्षतर्फ शून्य दशमलव ९ प्रतिशत मत बदर भएको छ । मुस्ताङमा कुल मतदाता १० हजार ९५७ जना रहेकोमा ६५ दशमलव ९८ प्रतिशत मतदान भएको थियो । प्रतिनिधि सभातर्फ कुल मतदाता मध्ये ७ हजार २५८ मत खसेको थियो । जसमध्ये ७ हजार १७० मत सदर भएको थियो भने ८८ मत बदर भएको थियो ।
यसैगरी प्रदेशतर्फ कुल मतदाता मध्ये ७ हजार २५६ जनाले मतदान गरेका थिए । जसमा ७ हजार १७७ मत सदर भएको थियो भने जम्मा ६९ मत मात्र बदर हुन पुगेको जिल्ला निर्वाचन अधिकारी मदन अर्यालले जानकारी दिए । उनका अनुसार प्रतिनिधि र प्रदेश (१) र (२)मा गरी कुल १५७ मत मात्र बदर भएको थियो ।
मुस्ताङ प्रदेश (१)मा कुल मत ३ हजार ४४१ मध्ये १ हजार ८५५ मत खसेको थियो । जसमध्ये सदर मत १ हजार ८४१ र बदर मत जम्मा १४ छ । यहाँ शून्य दशमलव ७४ प्रतिशत मत बदर भएको हो । यसैगरी मुस्ताङ प्रदेश ( २ )मा कुल ७ हजार ४१६ मतदाता मध्ये ५ हजार ४०१ मत खसेको थियो । यहाँ ७२ दशमलव ८२ प्रतिशत मतदान भएको थियो । प्रदेश (२)मा जम्मा ५५ मत अर्थात एक दशमलव ०१ प्रतिशत मत बदर भएको छ ।
प्रतिनिधि सभा समानुपातिकतर्फ पनि बदर मतको सख्या एकदमै कम देखिएको छ । प्रत्यक्षभन्दा प्रतिनिधि सभा समानुपातिकमा शून्य दशमलव २ प्रतिशत बढी मात्र बदर भएको हो । प्रतिनिधि सभा समानुपातिकमा कुल मतदाता ११ हजार ३९८ मतदाता रहेकोमा ७ हजार ६९९ मतदाताले मतदान गरेका थिए । जसमध्ये ७ हजार ५५७ अर्थात ६९ दशमलव ९ प्रतिशत मत सदर भएको थियो भने १४२ मत अर्थात एक दशलमव ८ प्रतिशत मत बदर भएको थियो ।
प्रदेश समानुपातिकतर्फ कुल १०९५७ मतदाता मध्ये ७ हजार २५५ मत खसेको थियो । जसमध्ये १६८ मत अर्थात दुई दशमलव ३ प्रतिशत मत बदर भएको थियो । यहाँ ७ हजार ८७ मत सदर भएको थियो ।
जिल्लाको एक मात्र अस्थायी मतदान केन्द्र जिल्ला कारागारमा २१६ जनाले मतदान गर्नुपर्नेमा जम्मा ९९ मत मात्र खसेको थियो ।
निर्वाचनमा खटिएका र अस्थायी मतदाता नामावलीमा नाम भएका कुल ४४१ जनाले मतदाता थिए ।
यसपटकको प्रतिनिधि सभामा एकै पटक अलग/अलग फरक/फरक मत पत्र लिएर क्रमैसंगै मतदान गर्नुपर्ने भएकाले पनि बदर मतको सख्या कम भएको बताईन्छ । तर,गत स्थानीय तह निर्वाचनमा एकै पटकमा अध्यक्ष/उपाध्यक्षसहित ७ जना बढीलाई मतदान गर्नुपर्ने भएकाले बदर मत बढी हुन पुगेको थियो । स्थानीय तह निर्वाचनमा पूर्ण बदर र आशिंक बदर मतको सख्या बढी थियो ।
२०७४ को प्रतिनिधि र प्रदेशसभा निर्वाचन मंसिर १० र मंसिर २१ गते सम्मपन्न भएको थियो । तर,सोही निर्वाचन र अहिले भएको निर्वाचनमा जम्मा ६ दिनको मात्र फरक थियो । तर,पहिलो निर्वाचन भन्दा यसपटक मतदान गर्नेको सख्या कम छ ।
२०७४ को प्रतिनिधि र प्रदेशसभा निर्वाचनमा मुस्ताङमा ७१ दशमलव ८४ प्रतिशत मतदान भएको थियो । प्रदेश (१)मा ५८ प्रतिशत र प्रदेश(२)मा ७९ प्रतिशत मतदान भएको थियो । २०७४ को निर्वाचन भन्दा यसपटक करिव ६ प्रतिशत कम मतदान भएको हो ।
प्रतिक्रिया दिनुहोस !
