मधेश प्रदेशको मुख्यमन्त्रीमा मेरो दाबी स्वभाविक  : रामचन्द्र मण्डल

जनकपुरधाम : प्रतिनिधिसभा र प्रदेशसभा निर्वाचनको नतिजा सार्वजनिक भएसँगै मधेश प्रदेशमा मुख्यमन्त्री को भन्ने विषयले चर्चा पाएको छ । प्रदेशसभाको प्रत्यक्ष ६४ सिटमध्ये १३ प्रत्यक्ष सिटमा र समानुपातिकमा सबैभन्दा बढी मत ल्याएको नेकपा एमाले भित्र मुख्यमन्त्री बन्नका लागि दौडधुप सुरु भएको छ । 

मुख्यमन्त्रीमा एमालेका केन्द्रीय सदस्य तथा धनुषा जिल्ला इन्चार्ज रामचन्द्र मण्डलको चर्चा पहिलो स्थानमा छ । १०७ सदस्यीय ( ९६४ प्रत्यक्ष ४३ समानुपातिक) प्रदेशसभामा एमाले जसपा गठबन्धनले जनमत र स्वतन्त्रसँग मिलेर सरकार बनाउने कसरतमा जुटेको छ । एमाले एक्लै १४, कांग्रेस १३, जसपा ९, लोसपा ७, जनमत ६, माओवादी ४, एकीकृत समाजवादी ४ र स्वतन्त्र ६ सिट हासिल गरेको छ । 

नेकपा माओवादी केन्द्रबाट पार्टी विभाजन हुँदा सांसद पद त्याग गरेर एमालेमै बसेको योगदान, व्यक्तित्व र समावेशीताका कारण पनि धनुषा १ ‘ख’बाट निर्वाचित मण्डल निर्विकल्प मुख्यमन्त्रीको दाबेदार भएको एमालेले जनाएको छ ।

पार्टीले रामचन्द्र मण्डललाई मुख्यमन्त्रीको पहिलो प्राथमिकतामा राखेको एमाले श्रोतको भनाइ छ । 
अब बन्ने सरकारको मुख्यमन्त्रीका लागि आफ्नो दाबी स्वाभाविक भएको मण्डलले बताएका छन् । यसअघि माओवादीमा रहदा संसदीय दलको नेता र एमालेमा रहदा पार्टीप्रतिको लगाव र मेहनतले स्थानीय निर्वाचनमा खेलेको भूमिका तथा प्रदेशसभा निर्वाचनमा एमाले जसपा गठबन्धनलाई विजयी गराएको नाताले पनि मुख्यमन्त्रीका लागि आफ्नो दाबी स्वभाविक रहेको मण्डलले बताए । 

‘मुख्यमन्त्री राजनीतिक सहमतिबाट टुंगिने विषय हो । मधेश प्रदेशका जनताले मलाई नै खोजिरहेको महशुस गरेको छु । एमालेको सबैभन्दा बढी हैसियत भएको र योग्यता, क्षमताको आधारमा पनि मलाई नै अघि बढाउन तयार हुनुहुन्छ । त्यसकारण अब बन्ने सरकारको मुख्यमन्त्री पदमा मेरो दाबी स्वाभाविक छ,' उनले भने ।

‘प्रदेशसभामा ठूलो दल एमालेको नेतृत्वमा सरकार बनाउने गरी राजनीतिक सहमति गर्छौं,' उनले भने । उनले आफ्नो नेतृत्वमा एमाले–जसपा, जनमत र स्वतन्त्र सहितको सरकार बन्ने र प्रदेशका जिल्लामा गरिब, निमुखा, घरबारविहीनलाई घर बनाई जनतालाई हस्तान्तरण गरिने बताए । 

मण्डलले जनताको आधारभूत आवश्यकता शिक्षा, स्वास्थ्य, रोजगार, पूर्वाधार विकास, ग्रामीण विद्युतीकरण, कृषि तथा पशुपालनलाई प्राथमिकता दिइने बताए । सबै जाति, भाषा, धर्म, सम्प्रदायको हितमा प्रदेश सरकारका गतिविधि अगाडि बढाइने उनको योजना छ । प्रदेशमा औद्योगिक क्षेत्रको विकास एवं विस्तार, साना तथा घरेलु उद्योगको प्रवद्र्धन, पर्यटकीय क्षेत्रमा टेवा पुग्ने गरी सरकारले काम गर्ने मण्डलले बताए । ‘दुःखलाई सुखमा बदल्न पहल गर्छौं । गरिब, निमुखा, सेवामुखी, न्यायमुखी र आयमुखी नीति लिनेछौं । व्यवस्था धेरै पटक बदलियौं। अब जनताको अवस्था बदल्नेछौं,' मण्डलले भने ।

धनुषा क्षेत्र नम्बर १ (ख) बाट दोस्रो पटक निर्वाचित भएका हुन् । उनले सत्तारुढ गठबन्धनका लोसपा उम्मेदवार संजय सिंह ३ हजार १ सय १७ मतान्तरले पराजित गरेका हुन् । मण्डललाई मुख्यमन्त्रीमा अघि सार्न धनुषा निर्वाचन क्षेत्र नं २ (ख) का लखनलाल दासले समर्थन गर्ने जनाएका छन् । अहिलेकै अस्थामा प्रदेशको सबैभन्दा ठूलो दलको हैसियतले मुख्यमन्त्रीको दाबी पेश गर्ने त्यसले बन्ने सरकारको विषय निर्धारण गर्नेछ । 

मण्डलले एमालेका हरिनारायण महतो, मो. समिर, लखन लालदास जस्ता साथीहरु आफ्नो पक्षमा रहेकोले मुख्यमन्त्रीमा स्वभाविक दाबी रहेको बताए । उनले भने, ‘केन्द्रीय हेडक्वाटरसम्म कुरा पुगिसकेको छ, वहाँहरु पनि सकारात्मक हुनुहुन्छ, त्यसैले मेरो अनुभव र संसदीय अभ्यासलाई अगाडि बढाउन मेरो आवश्यकता पर्छ ।’