काठमाडौं : बाजुरामा मतगणना सुरु भएको छ।
गत मंसिर ४ गते सम्पन्न प्रतिनिधिसभा तथा प्रदेशसभा निर्वाचनका क्रममा मतदानस्थलमा विवाद भएपछि रोकिएको मतगणना ११ दिनपछि सुरु भएको हो।
मार्तडीस्थित जिल्ला प्रशासन कार्यालयको नव निर्मित भवनमा मतगणना भइरहेको छ। मतगणना स्थल बाहिर सुरक्षा व्यवस्था कडा पारिएको छ।
निर्वाचन आयोगले बाजुरामा रोकिएको मतगणना सुरु गर्न बुधबार निर्णय गरेको थियो। तर, दलहरुबीच सहमति जुट्न नसक्दा मतगणनामा ढिलाइ भएको हो।
आयोगले मतगणनाको निर्णय गरेसँगै मुख्य निर्वाचन अधिकृतको कार्यालय बाजुराले तीनपटक सर्वदलीय बैठक बोलाएको थियो। दुई पटक बसेको बैठक निष्कर्षविहीन बनेपछि आज बिहान तेस्रो पटक बसेको बैठकले मतगणनाका लागि सहमति जुटाएको हो।
निर्वाचनका क्रममा मतदानस्थलमा झडप भएपछि दुईजनाले ज्यान गुमाएका छन्। सोही विषयलाई लिएर कांग्रेस र एमालेका कार्यकर्ताबीच उत्पन्न विवादले मतगणना प्रभावित भएको थियो।
प्रतिनिधिसभा सदस्य उम्मेदवारका लागि गठबन्धनका साझा उम्मेदवार कांग्रेसका सह-महामन्त्री बद्री पाण्डे र एमालेका कर्ण थापा चुनावी मैदानमा छन्।
यस्तै, राप्रपाका जंगकुमार गिरि,जनता समाजवादी पार्टीका रामबहादुर शाही र स्वतन्त्र उम्मेदवार टेकबहादुर बडुवाल प्रतिस्पर्धामा छन्।
पाण्डे र थापाबीच कडा प्रतिस्पर्धा हुने देखिएको छ।
पाण्डेको अरु दलसँगको पहिलो प्रतिस्पर्धा हो भने थापासँग २०५६,२०६४ र २०७० मा चुनाव लडेको अनुभव छ।
दुवैजना राजनीतिक विरासत र केन्द्रीय राजनीतिमा राम्रो पकड भएका नेता हुन्।
प्रतिक्रिया दिनुहोस !
